Qasym-Jomart Toqaev bilim berý úderisine tsıfrlyq tehnologııalar men jasandy ıntellektini jedel engizýdi tapsyrdy
ASTANA. KAZINFORM - Tsıfrlandyrý men jasandy ıntellektini ıgerý bilim salasyndaǵy teńsizdikti eńserip, oqý sapasyn aıtarlyqtaı arttyrýǵa úles qosady. Bul týraly elordada ótip jatqan ustazdardyń respýblıkalyq tamyz konferentsııasynda Memleket basshysy Qasym-Jomart Toqaev aıtty.
- Álem jańa tehnologııalyq dáýirge qadam basty. Onyń basty nyshanyn ınnovatsııanyń qarqyndy damýy men jasandy ıntellektiniń ómirimizge dendep enýinen baıqaýǵa bolady. Sondyqtan búginde «ozyq oıly ult» pen «tehnologııalyq ult» uǵymdary egiz. Bizdiń mindetimiz – jahandyq úrdisterge beıimdelý. Ol úshin bilim berý júıesindegi tsıfrlyq transformatsııanyń qarqynyn údetý óte mańyzdy. Tsıfrlandyrý men jasandy ıntellektini ıgerý bilim salasyndaǵy teńsizdikti eńserip, oqý sapasyn aıtarlyqtaı arttyrýǵa úles qosady, - dedi Qasym-Jomart Toqaev.
Prezıdenttiń aıtýynsha, búginde elimizdegi mektepterdiń 95 paıyzdan astamy jyldam ınternetpen qamtylǵan. Atalǵan kórsetkishti 100 paıyzǵa jetkizý kerek. Jerserik júıeleriniń múmkindikterin osy maqsatqa paıdalanýǵa bolady.
- Muny jaı ǵana ınfraqurylymǵa teńdeı qol jetkizý máselesi emes, áleýmettik ádildiktiń mańyzdy ıdeologııalyq qaǵıdaty retinde qarastyrǵan jón. Sonymen qatar ozyq ınnovatsııalyq tásilder erekshe qajettiligi bar balalardyń tolyqqandy bilim alýyna jol ashyp, ınklıýzıvti orta qalyptastyrýǵa múmkindik berýde. Elimizde mektepke nemese kolledjge qabyldaý, sondaı-aq basqa mektepke aýysý boıynsha barlyq negizgi qyzmetter tsıfrlyq júıege kóshirilgen.
Elektrondy Úkimettiń mobıldi qosymshasynda bilim salasyna qatysty barlyq aqparat jınalǵan Bilim qyzmeti jumys istep tur,- dedi Qasym-Jomart Toqaev.
Memleket basshysynyń paıymynsha, muǵalimder memlekettik mańyzy bar jumysty atqaryp jatyr.
Degenmen, ustazdyń nazary bala oqytý isinde bolýǵa tıis.