Qasym-Jomart Toqaev Beıjińde Transkaspıı kólik dáliziniń mańyzy týraly aıtty
Qazaqstan Prezıdenti Qasym-Jomart Toqaev Beıjińde ótip jatqan joǵary deńgeıdegi «Bir beldeý, bir jol» ІІІ forýmynda Transkaspıı halyqaralyq kólik baǵytynyń erekshe róline nazar aýdardy, dep habarlaıdy Kazinform.
Bul baǵdar Qytaıdy, Ortalyq Azııany jáne Eýropany baılanystyratyn «Bir beldeý, bir jol» bastamasynyń qurlyqtaǵy kópirine aınala alady. Osy rette júk tasymaldaý merzimin eki ese qysqartýǵa jáne kólik shyǵyndaryn aıtarlyqtaı tómendetýge yqpal etedi.
«Qazaqstan men Qytaı arasynda Transkaspıı baǵytyn damytý jónindegi úkimetaralyq eki kelisimge qol qoıyldy. Jýyq arada bul kelisimder aıtarlyqtaı nátıje beretinine senimdimin. Kúsh-jigerimizdi tıimdirek úılestirý úshin Іri strategııalyq porttardyń, logıstıka ortalyqtarynyń jáne poshta habtarynyń seriktestik jelisin qurýdy usynamyn. Sonymen qatar kemeler men konteınerlerdiń birlesken óndirisin jolǵa qoıýǵa múddelimiz. Qazaqstan jolaýshylar men júkterdi turaqty tasymaldaý isin qamtamasyz ete otyryp, álemniń jetekshi áýe kompanııalary úshin senimdi áýe kópiri jáne yńǵaıly aılaq bolýǵa daıyn», – dedi Qasym-Jomart Toqaev.
Memleket basshysynyń pikirinshe, jańa jahandyq joba sanalatyn «Tsıfrlyq Jibek joly» bastamasy aıasyndaǵy seriktestik mol múmkindikterge jol ashady.
«Tsıfrlyq jáne zııatkerlik yqpaldastyqtyń jańa modelin qurý ekonomıkamyzdyń ınnovatsııalyq turǵyda damýyna eleýli úles qosatynyna senimdimin. «Bir beldeý, bir jol» bastamasynyń jańa onjyldyǵynda Qazaqstan ortaq tabysqa jetýge jan-jaqty atsalysýdy jalǵastyrady. Qurmetti Tóraǵa Sı Tszınpın, Sizdiń dana basshylyǵyńyzben QHR túrli halyqtardyń ortaq tarıhı taǵdyry tujyrymdamasy negizinde Qytaıdyń jańa dáýirin qalyptasyrýda odan ári zor jetistikterge jetetinine senimdimin», – dep qorytyndylady sózin Qasym-Jomart Toqaev.
Sonymen qatar forýmda Qytaı Tóraǵasy Sı Tszınpın, Reseı Prezıdenti Vladımır Pýtın, Indonezııa Prezıdenti Djoko Vıdodo, Argentına Prezıdenti Alberto Fernandes, Efıopııa Premer-mınıstri Abıı Ahmed, BUU Bas hatshysy Antonıý Gýterrısh sóz sóıledi. Sharaǵa 20-dan astam memlekettiń basshylary jáne 130-dan asa el men halyqaralyq uıymdardyń ókilderi qatysyp jatyr.
