Qasym-Jomart Toqaev Bernd Ýlbrıhtty qabyldady
ASTANA. KAZINFORM – Qasym-Jomart Toqaev Siemens AG kompanııasynyń kommertsııa jáne qarjy máseleleri jónindegi vıtse-prezıdenti Bernd Ýlbrıhtty qabyldady. Bul týraly Aqorda habarlady.
Memleket basshysynyń Germanııadaǵy resmı saparynyń ekinshi kúni Siemens AG kompanııasynyń kommertsııa jáne qarjy máseleleri jónindegi vıtse-prezıdenti Bernd Ýlbrıhtpen kezdesýden bastaldy.
Prezıdenttiń aıtýynsha, Siemens – elimizdiń asa mańyzdy seriktesi. Óıtkeni kompanııa qyzmetindegi ónerkásipti tsıfrlandyrý, elektrlendirý, utqyrlyq pen ıntellektýaldy ınfraqurylym sııaqty negizgi baǵyttar Qazaqstannyń jańǵyrý basymdyqtaryna saı keledi.
Qasym-Jomart Toqaev Bernd Ýlbrıhtke ekonomıkanyń naqty sektorlaryndaǵy tsıfrlyq transformatsııa boıynsha qolǵa alynǵan júıeli sharalar týraly aıtty. Osy oraıda, Memleket basshysy Siemens pen qazaqstandyq Silk Road Electronics kompanııalarynyń Qarmet metallýrgııa kombınaty qural-jabdyqtaryn jańǵyrtý jónindegi birlesken jobasyna qoldaý bildirdi.
Prezıdent Qazaqstannyń ozyq qural-jabdyqtardy satyp alýǵa ǵana emes, óndiristik, ınjenerlik jáne servıstik ortalyqtardy qurýǵa da qyzyǵýshylyq tanytatynyn málimdedi.
Atap aıtqanda, Siemens kompanııasynyń quzyretteri men tehnologııalyq ınnovatsııalary elimizdiń energetıkalyq jáne kommýnaldyq sektorlaryn jańǵyrtýda, sondaı-aq qorshaǵan ortanyń jaǵdaıyna monıtorıng jasaý sapasyn arttyrýda paıdaly bolar edi.
Kezdesýde Siemens Healthineers kompanııasymen medıtsınalyq tehnologııa salasyndaǵy yqpaldastyqty keńeıtýdiń áleýeti mol ekenine nazar aýdaryldy.
Aıta keteıik, Memleket basshysynyń Germanııaǵa resmı sapary Mıýnhen qalasynda jalǵasady.
