Qasym-Jomart Toqaev Ázerbaıjan Prezıdentin Aqordada qarsy aldy
ASTANA. KAZINFORM — Aqordada Memleket basshysy Qasym-Jomart Toqaev elimizge memlekettik saparmen kelgen Ázerbaıjan Prezıdenti Ilham Álıevti qarsy aldy. Aldymen Qasym-Jomart Toqaev pen Ilham Álıev bir-birine resmı delegatsııa múshelerin tanystyrdy.
Osydan keıin mártebeli meımannyń saparyna oraı saltanatty rásimder zalynda sap túzegen qurmet qaraýylynyń bastyǵy Memleket basshylaryna sálemdik baıanat berdi. Prezıdent orkestri eki eldiń memlekettik Ánuranyn oryndady.
Ánurandardy tyńdap bolǵannan keıin Qasym-Jomart Toqaev pen Ázerbaıjan Prezıdenti kilemshe boıymen Qazaqstan Respýblıkasynyń Memlekettik Týyna qaraı júrdi.
Onyń aldyna kelgende meıman toqtap, basyn sál ıip, óziniń qurmetin bildirdi. Sonan soń Memleket basshylary qurmetti qaraýyl sapynyń boıymen júrdi. Qurmetti qaraýyl bastyǵymen qoshtasty.
Aıta keteıik, qazirgi ýaqytta eki el basshylary kelissóz júrgizip jatyr. Odan keıin Qazaqstan men Ázerbaıjan Joǵary memleketaralyq keńesiniń ekinshi otyrysy ótedi.
Keshe Qasym-Jomart Toqaev mártebeli meımandy Astana áýejaıynan kútip alǵan edi.
Buǵan deıin Ázerbaıjan Prezıdenti Ilham Álıev Qazaqstanǵa memlekettik sapary qarsańynda Kazinform agenttigine eksklıýzıvti suhbat berip, eki el arasyndaǵy saıası dıalogtiń joǵary deńgeıi, kólik-logıstıka men munaı-gaz salasyndaǵy yntymaqtastyqtyń qarqyndy damýy, sondaı-aq «jasyl» energetıka salasyndaǵy birlesken jumys pen Túrki memleketteri uıymy aıasyndaǵy bastamalardyń bolashaǵy jaıynda aıtyp berdi.