Toqaev júk tasymaldaý úderisin jeńildetýge baǵyttalǵan júıeniń jumysyn synǵa aldy
ASTANA. KAZINFORM — 2019 jyly áýe kóligimen júk tasymaldaý úderisin jeńildetýge baǵyttalǵan «E-freight» júıesi iske qosyldy. Biraq búginge deıin bul júıeniń qyzmeti shekteýli kúıinde qalyp otyr. Bul týraly Memleket basshysy óńirlik júk avıahabtaryn damytý jóninde keńeste aıtty.
Qasym-Jomart Toqaev avıatsııa salasyn tsıfrlandyrýǵa basa nazar aýdardy.
— Kóliktiń barlyq túrimen júk tasymaldaý naryǵyndaǵy ózara yqpaldastyq «biryńǵaı tsıfrlyq tereze» qaǵıdaty boıynsha júrgizilýge tıis. 2019 jyly áýe kóligimen júk tasymaldaý úderisin jeńildetýge baǵyttalǵan «E-freight» júıesi iske qosyldy. Biraq búginge deıin bul júıeniń qyzmeti shekteýli kúıinde qalyp otyr. Qujattardy resimdeýdi keshiktirý faktileri bar, — dedi Memleket basshysy.
Qasym-Jomart Toqaevtyń pikirinshe, ózekti máseleniń biri — avıatsııa salasyna qajetti kásibı mamandar daıarlaý.
— Bilikti kadrlar bolmasa, reformalardy júzege asyrý múmkin emes. Bul salada kadr tapshylyǵy qatty sezilip otyr. Jyl saıyn júzdegen maman kerek bolýda. Osy máseleni shuǵyl sheshý qajet. Úkimetke kadr daıarlaý júıesin reformalaýǵa qatysty naqty sharalar qabyldaýdy tapsyramyn. Halyqaralyq bilim-ǵylym mekemelerimen baılanys ornatý qajet. Sondaı-aq mamandardyń biliktiligin arttyratyn quzyret ortalyqtaryn qurý kerek, — dedi Qasym-Jomart Toqaev.
Memleket basshysy kólik jáne logıstıka salasyn damytýdyń strategııalyq máni zor ekenin aıtyp, bul máseleni óz baqylaýynda ustaıtynyn jetkizdi.
Budan buryn Prezıdent avıahabtardy damytý kólik-tasymal salasyndaǵy basym baǵyttardyń biri sanalatynyna toqtaldy.
Sonymen qatar Toqaev avıaotyn máselesin túbegeıli sheshýdi tapsyrdy.