Qasym-Jomart Toqaev «Avaza» kongress-ortalyǵyna bardy

ASTANA. KAZINFORM – Prezıdent Teńizge shyǵar joly joq damýshy elderge arnalǵan Birikken Ulttar Uıymynyń úshinshi konferentsııasynyń delegatsııa basshylaryn resmı qarsy alý rásimine qatysý úshin «Avaza» kongress-ortalyǵyna bardy, dep habarlaıdy Aqordanyń baspasóz qyzmeti.

Qasym-Jomart Toqaevty Túrikmenstan Halk Maslahatynyń tóraǵasy Gýrbangýly Berdimuhamedov kútip aldy.

Osyǵan deıin áýejaıda Qasym-Jomart Toqaev pen Gýrbangýly Berdimuhamedov az-kem áńgimeleskeni týraly jazdyq. 

Memleket basshysy Qazaqstan men Túrikmenstan yntymaqtastyǵy órkendep, qarqyn ala túskenin atap ótti.

– Qurmetti Gýrbangýly Mıalıkgýlyevıch, Sizben qasıetti túrikmen jerinde, baýyrlas Túrikmenstanda qaıta júzdeskenime qýanyshtymyn. Shaqyrýyńyzdy shyn nıetpen qabyl aldym. BUU Bas hatshysynyń qatysýymen osyndaı forým ótkizý – úlken jetistik. Bul 30 jyldan beri beıtarap saıasat ustanyp kele jatqan Túrikmenstannyń halyqaralyq abyroı-bedeli joǵary ekenin kórsetedi. Qazaqstan atalǵan saıasatty tolyǵymen qoldaıdy, – dedi Qasym-Jomart Toqaev.