Qasym-Jomart Toqaev: Aýyldaǵy jaǵdaıdy jaqsartyp, jumysty kúsheıtýimiz kerek

ASTANA. KAZINFORM - Prezıdent Qasym-Jomart Toqaev aýyl ákimderiniń dıalog-platformasynda aýyldaǵy oń ózgeristerge toqtaldy. Bul týraly Aqorda habarlady.

Memleket basshysy búgin Úkimet aldaǵy bes jylǵa arnalǵan Óńirlerdi damytý tujyrymdamasyn bekitkenin atap ótti.

- Sońǵy jyldary aýyl turǵyndarynyń turmys sapasyn arttyrý úshin tıisti jumys júrgizilip jatyr. 2022 jyly halyqtyń tabysyn arttyrýǵa arnalǵan keshendi jospar qabyldandy. Bıyl Úkimet aldaǵy bes jylǵa arnalǵan Óńirlerdi damytý tujyrymdamasyn bekitti. Aýylǵa qomaqty ınvestıtsııa tartyldy. 2021 jyldan beri aýyl halqyna alǵashqy medıtsınalyq-sanıtarlyq kómek kórsetetin 864 nysan salyndy. Sondaı-aq 388 jańa mektep ashyldy. Byltyr 2 myńǵa jýyq aýyl mektebine sapaly ınternet berildi. Jyl ótken saıyn aýyldyń áleýeti artyp keledi, - dedi Prezıdent.

Búginde ózin-ózi qamtamasyz etý deńgeıi joǵary aýyldardyń sany kóbeıe túsken.

- Aýyl sharýashylyǵynyń jalpy ónimi alty jylda 1,5 eseden astam ósip, 8,3 trıllıon teńgege jetti. Bıyl aýyldaǵy sharýalarǵa 1 trıllıon teńge kóleminde qoldaý kórsettik. Dál osyndaı memlekettik qoldaý kórsetken elder kóp emes, tipti, bul kóptegen el qol jetkize almaıtyn qarjylaı kómek deýge bolady. Alaıda aldymyzda bıik maqsattar tur: biz aýyldaǵy jaǵdaıdy jaqsartyp, jumysty kúsheıtýimiz kerek, - dedi Prezıdent.

Prezıdent Qasym-Jomart Toqaev aýyl ákimderiniń dıalog-platformasynda sóz sóılep, ákimniń, eń aldymen halyqpen tikeleı jumys isteıtin memlekettik qyzmetshi ekenin eske saldy.