Qasym-Jomart Toqaev: Astana — egemen elimizdiń júregi

Prezıdenttiń sózinshe, elorda — Táýelsiz Qazaqstannyń sımvoly, jarqyn bolashaqqa umtylǵan ultymyzdyń jasampaz kúsh-qýatynyń qaınary.

— Qurmetti otandastar! Astana kúni qutty bolsyn! Astana — egemen elimizdiń júregi. Elordamyz — Táýelsiz Qazaqstannyń sımvoly, jarqyn bolashaqqa umtylǵan ultymyzdyń jasampaz kúsh-qýatynyń qaınary. Halqymyzdyń taǵdyryna tikeleı áser etetin sheshimder osy qalada qabyldanady. Bas qalamyz aýqymdy tarıhı ózgeristerdiń qozǵaýshy kúshine aınaldy. Astana sapalyq turǵydan múlde jańa basqarý júıeleri engizilgen «aqyldy qala» mártebesine ıe boldy. Sonymen birge elordamyzda saıabaqtar, gúlzarlar, balalarǵa arnalǵan alańdar salyndy. Osynyń bári Astana turǵyndary men qonaqtary úshin jasalyp jatyr, — dedi ol.

Qasym-Jomart Toqaev elorda kúni qarsańynda ult jylnamasyndaǵy túbegeıli betburys kezeńine jol ashqan Halyq Konstıtýtsııasy zańdy kúshine engenin alǵa tartty. 

— Munyń sımvoldyq máni bar. Shyn máninde, osy tarıhı oqıǵa bılik pen qoǵamnyń negizgi ınstıtýttaryn jańǵyrtý isiniń bastaýy sanalady. Elordamyzdyń mártebesi týraly jańa konstıtýtsııalyq zań Astananyń saıası, ákimshilik, ekonomıkalyq jáne mádenı ortalyq retindegi rólin kúsheıtip, onyń memleket damýyndaǵy aıryqsha mán-mańyzyn aıqyndaı tústi. Bas shahardyń halyqaralyq abyroı-bedeli de nyǵaıyp keledi. Aımaqtyq jáne jahandyq saıasattyń asa ózekti máselelerine qatysty sheshimderdiń Astanada qabyldanýy — sonyń aıqyn dáleli. Bas qalamyz jaýapty azamattyq ustanymǵa, «Zań men Tártipke», «Taza Qazaqstan» qaǵıdattaryna negizdelgen jańa qoǵamdyq etıkanyń jarqyn kórinisi bolýǵa tıis. Elordamyz Ádiletti Qazaqstandy qurý jolynda úlgi-ónege kórsetip, ósip-órkendeı beredi dep senemin. Qurmetti Astana turǵyndary, barshańyzǵa amandyq jáne tabys tileımin! — dep túıindedi Memleket basshysy.

Osydan buryn Kazinform tilshisi Astananyń el ekonomıkasyndaǵy salmaǵy qandaı ekenin zerdelep kórdi.