Qasym-Jomart Toqaev Astana AI Film Festival halyqaralyq kınofestıvaliniń ashylý saltanatyna qatysty
Memleket basshysy Astana AI Film Festival jasandy ıntellekt qoldanǵan fılmderdiń birinshi halyqaralyq baıqaýynda sóz sóılep, atalǵan festıvaldiń ereksheligin atap ótti.
– «Astana AI Film Festival» – izdenimpaz, bilimpaz, jańashyl, jasampaz azamattar synǵa túsetin, buryn-sońdy bolmaǵan biregeı joba. Bul – ushqyr oı men tyń bastamalardyń básekesi. Qazirgi zaman – bilim men ǵylymnyń jáne ozyq ınnovatsııanyń dáýiri. Jasandy ıntellekt álem ekonomıkasynyń barlyq salasyna túbegeıli ózgerister ákelýde. Bir sózben, tehnologııalyq ilgerileý, ıaǵnı progress jappaı jahandyq sıpatqa ıe boldy, – dedi Qasym-Jomart Toqaev.
Memleket basshysynyń aıtýynsha, osy biregeı joba – elimizdegi kreatıvti ındýstrııa salasynyń qarqyndy damýynyń jarqyn kórinisi. Qazaqstan bul baǵytta birtutas ekojúıe qurý úshin naqty sharalar qabyldap jatyr. Sonymen qatar daryndy azamattarǵa jan-jaqty qoldaý kórsetiledi.
Prezıdent jasandy ıntellektini jaýapkershilikpen qoldanýdyń ózektiligine toqtaldy.
– Tehnologııa buryn-sońdy bolmaǵan qarqynmen damyp jatqan tusta saıasatkerler, ǵalymdar men sala kóshbasshylary jasandy ıntellekt múmkindikteriniń jáne ony baqylaýsyz qoldanýdyń qateri arta túskenine alańdaýly. Bir anyǵy, bul úderisti toqtatý múmkin emes. Meniń oıymsha, oǵan eshkimniń talasy joq. Adamzat tarıhynda Prometeı alaýy órkendeýdiń nyshany bolýmen qatar dúleı kúsh retinde de qarastyryldy. ıAdrolyq energetıkaǵa qatysty da osy mysaldy keltirýge bolady. Sondyqtan eń áýeli qaýipsizdikke basa nazar aýdaryp, jasandy ıntellektini damytý men jaýapkershilikpen qoldaný erejesin ázirlegenimiz jón. Bul óskeleń urpaqtyń alańsyz keleshegi úshin qajet. Bolashaq tehnologııasynyń zor shyǵarmashylyq áleýetin ıgilikke jaratý úshin qoldan kelgenniń bárin jasaýymyz kerek. Búgingi festıvaldiń basty ıdeıasy da osy, – dedi ol.
