Qasym-Jomart Toqaev: Assambleıa – keıbir adamdar aıtyp júrgendeı, jasandy uıym emes

ASTANA. KAZINFORM – Assambleıa – el birligin is júzinde ornyqtyra túsetin tıimdi qurylym. Bul týraly Memleket basshysy Qasym-Jomart Toqaev «Birlik. Jasampazdyq. Órleý» taqyrybymen ótip jatqan Qazaqstan halqy Assambleıasynyń kezekti HHHІІІ sessııasynda aıtty.

«Tasqyn bastalǵannan beri Qazaqstan halqy assambleıasy belsendi ári úılesimdi jumys istep jatyr. Oǵan búkil el kýá. Jurtqa jan-jaqty kómek berý úshin dereý Assambleıanyń respýblıkalyq jáne aımaqtyq shtabtary quryldy. «Júrekten júrekke» degen aýqymdy aktsııa júrgizilip jatyr. Apat aımaqtaryna 1500 tonnadan astam azyq-túlik jáne eń qajetti taýarlar joldandy. Onyń jalpy somasy shamamen 770 mıllıon teńge boldy. Sý tasqynymen kúreske etnomádenı birlestikterdiń 12 myńǵa jýyq ókili qosyldy. Olar qaıyrymdylyq jáne gýmanıtarlyq kómek jınaýǵa jumyldy. Sondaı-aq jurtty qaterden habardar etýge jáne qaýipsiz jerge kóshirýge atsalysty. Munyń bári – ózara janashyr jáne tileýles bolýdyń aıqyn kórinisi», - dedi Qasym-Jomart Toqaev. 

Prezıdent Batys Qazaqstan, Soltústik Qazaqstan, Qostanaı oblystaryna arnaıy barǵanyn, kezdesý kezinde jurtshylyq Assambleıa múshelerine zor rızashylyq bildirgenin basa aıtty.

«Assambleıa – keıbir adamdar aıtyp júrgendeı, jasandy uıym emes. Assambleıa – el birligin is júzinde ornyqtyra túsetin tıimdi qurylym. Búginde bul – konstıtýtsııalyq mártebesi bar mańyzdy qoǵamdyq organ. Assambleıa óte aýqymdy qaıyrymdylyq sharalaryn der kezinde jáne jedel uıymdastyryp keledi. Munyń bári kóp jyldyq júıeli jumystyń nátıjesi ekeni sózsiz. Assambleıa músheleri «Qaıyrymdylyq kerýeni» jobasy arqyly muqtaj jandarǵa únemi qoldaý kórsetip júr. Byltyrdyń ózinde quny 1,7 mıllıard teńgeden asatyn kómek berildi. Birligi myqty halyqtyń kúsh-qýaty azamattardyń bir-birine degen osyndaı qamqorlyǵynan aıqyn kórinedi», - dedi Memleket basshysy.