Qasym-Jomart Toqaev Armenııa Prezıdenti Vaagn Hachatýrıanmen kezdesti
EREVAN. KAZINFORM – Qazaqstan Prezıdenti Armenııaǵa alǵashqy resmı saparyna erekshe mán beretinin atap ótti, dep habarlaıdy Aqordanyń baspasóz qyzmeti.
– Armenııa Qazaqstan úshin mańyzdy, óte maǵynaly seriktes bolyp tabylady. Ejelgi órkenıet bastaý alǵan tarıhy men mádenıeti baı armıan halqynyń jerine ystyq yqylaspen, erekshe sezimmen kelip otyrmyn, – dedi Qasym-Jomart Toqaev.
Prezıdenttiń aıtýynsha, Premer-mınıstr Nıkol Pashınıanmen júrgizgen kelissózder barysynda kún tártibindegi máseleler jan-jaqty ári nátıjeli talqylanǵan.
– Qazaq-armıan qatynastaryn jan-jaqty nyǵaıtýǵa qatysty ózara umtylysymyzdy rastadyq. Bul búgingi kelissózderdiń – basty nátıjesi. Biz mańyzdy ýaǵdalastyqtarǵa qol jetkizdik. Qazaqstan men Armenııanyń kópjaqty ózara yqpaldastyǵyn odan ári nyǵaıtý josparyn naqtyladyq. Sondaı-aq halyqaralyq jáne aımaqtyq kún tártibindegi máselelerdi qarastyrdyq, – dedi Memleket basshysy.
Qasym-Jomart Toqaev pen Vaagn Hachatýrıan qazaq-armıan yntymaqtastyǵyna qatysty birqatar ózekti máseleni talqylap, saıası, saýda-ekonomıkalyq, kólik-tranzıttik jáne mádenı-gýmanıtarlyq salalardaǵy ózara yqpaldastyqqa basa nazar aýdardy.
Armenııa Prezıdenti Memleket basshysynyń Erevanǵa sapary tarıhı mańyzǵa ıe ekenin atap ótip, kelissózderdiń qorytyndysy eki el arasyndaǵy baılanystardy nyǵaıtý úshin berik irgetas qalyptastyratynyn, memleketaralyq qatynastardy jańa deńgeıge kóteretinin jetkizdi.
– Sizdiń saparyńyz Qazaqstan men Armenııa arasyndaǵy qarym-qatynastardy odan ári damytýǵa jáne nyǵaıtýǵa yqpal etetinine senimdimin. Bizdi ortaq tarıh pen qazirgi qarym-qatynastar baılanystyrady. Qazirgideı kúrdeli kezeńde ózara yntymaqtastyqty damytyp jatyrmyz. Sizdiń basshylyǵyńyzben Qazaqstan barlyq baǵytta tabysqa qol jetkizip otyrǵanyna kýámiz. Men Sizge jáne barsha qazaq halqyna jańa jetistik tileımin, – dedi Vaagn Hachatýrıan.
