Qasym-Jomart Toqaev Aral jáne Kaspııdegi ekologııalyq problemalardy atap ótti

ASTANA. KAZINFORM – Qasym-Jomart Toqaev forýmda sóılegen sózinde transshekaralyq sýdy paıdalaný, Aral jáne Kaspıı teńizderinde qalyptasqan ekologııalyq problemalarǵa nazar aýdardy. 

Prezıdent sý qaýipsizdigin qamtamasyz etýge erekshe mán berý qajet dep sanaıdy.

– Sý tapshylyǵy úlken problemaǵa aınalyp keledi. Bul resýrsty saqtaý ári uqypty paıdalaný – elimiz ben aımaqtaǵy ózge de memleketter úshin strategııalyq, tipti ómirlik mańyzy bar basymdyq. Ózge elderde de solaı dep oılaımyn. Transshekaralyq sýdy paıdalaný problemasyn, Aral jáne Kaspıı teńizderinde qalyptasqan ekologııalyq ahýaldy ýaqyt ozdyrmaı sheshý maqsatynda tıisti sharalar qabyldaý qajet. Bizdiń pikirimizshe, ózara mámilege negizdelgen birlesken áreketter arqyly Halyqaralyq Araldy qutqarý qorynyń tıimdiligin arttyrýǵa bolady. Reseı Qor jumysyna baıqaýshy retinde atsalyssa, bul iske septigin tıgizer edi. Kaspıı teńizi qazirgideı tartyla berse, bul qaýipti qubylystyń ekologııalyq, áleýmettik-ekonomıkalyq, tipti saıası saldary aýyr bolýy múmkin. Qazaqstan Kaspıı ekojúıesiniń buzylýy men teńizdiń tartylýynyń aldyn alýǵa baǵyttalǵan arnaıy memleketaralyq baǵdarlama ázirleý týraly bastama kóterdi. Barsha álemdik qoǵamdastyqty osy biregeı sý aıdynyn saqtap qalý jolyndaǵy kúsh-jigerimizdi qoldaýǵa shaqyramyz, - dedi Qasym-Jomart Toqaev.

Eske sala keteıik, buǵan deıin Prezıdent Aýǵanstanǵa kómek kórsetýdi jalǵastyrý qajet dep esepteıtinin aıtqan edi.