Qasym-Jomart Toqaev AÓSShK sý resýrstary seriktestigin qurýdy usyndy
ASTANA. KAZINFORM – AÓSShK VII sammıtinde sóılegen sózinde Qazaqstan Prezıdenti Ázerbaıjanmen birlesip, Baký – Tbılısı – Jeıhan qubyry arqyly Qazaqstan munaıyn tasymaldaýdyń kólemin arttyrý jónindegi jospary týraly aıtty, dep habarlaıd Aqordanyń baspasóz qyzmeti.
– Kaspıı teńizi óńirimizdiń ǵana emes, álemniń energetıkalyq qaýipsizdigin qamtamasyz etýde aıryqsha mańyzǵa ıe bolyp otyr. Qazaqstan Kaspıı óńirdegi jáne odan tysqary memleketterdiń ortaq ıgiligi úshin árqashan beıbitshilik pen yntymaqtastyq keńistigi bolýy kerek dep sanaıdy. Bul rette sý resýrstary men ekologııa salasyndaǵy birlesken kúsh-jiger arqyly ony saqtap qalý óte ózekti, – dedi Qasym-Jomart Toqaev.
Memleket basshysy AÓSShK qyzmetindegi ekologııalyq baǵyttyń mańyzy arta túskenin atap ótti.
Onyń pikirinshe, sý resýrstarynyń tapshylyǵy men ekojúıeniń tozýy Azııadaǵy eń kúrdeli syn-qaterdiń birine aınaldy.
– Azııa men Tynyq muhıty aımaǵynda dúnıe júzi halqynyń 60 paıyzy mekendeıdi. Alaıda bul óńir álemdik sý qorynyń 35 paıyzyna ǵana ıelik etedi. Sáıkesinshe, óńirdiń sý resýrstarymen qamtylýy jan basyna shaqqanda álem boıynsha tómengi orynda. Qazaqstan sý resýrstary aldaǵy ýaqytta da yntymaqtastyqtyń kózi bolýy kerek dep sanaıdy. Osyǵan oraı tehnologııa almasý, birlesip zertteý jáne sý únemdeıtin sheshimderdi ilgeriletý maqsatynda AÓSShK sý resýrstary seriktestigin qurýdy usynamyn. Bul rette Qazaqstan Birikken Ulttar Uıymy júıesinde sý resýrstaryna qatysty jahandyq kún tártibin júıeli úılestirýdi qamtamasyz etetin Halyqaralyq sý uıymyn qurý bastamasyn kóterdi. Atalǵan usynysty AÓSShK múshe memleketteriniń qosylýyna múmkindik bere otyryp, Ortalyq Azııa elderi men Ázerbaıjan birlese ilgeriletýine bolady, – dedi Prezıdent.
Osyǵan deıin Memleket basshysy preventıvti dıplomatııa tetigin iske qosýdy usynǵan bolatyn.
