Qasym-Jomart Toqaev AÓSShK-ni biregeı halyqaralyq forým dep atady
BAKÝ. KAZINFORM — Memleket basshysy AÓSShK VII sammıtinde sóz sóıledi. Qazaqstan Prezıdenti qonaqjaılyq kórsetkeni jáne sammıtti joǵary deńgeıde uıymdastyrǵany úshin Ázerbaıjan Prezıdenti Ilham Álıevke alǵys aıtty, dep habarlaıdy Aqordanyń baspasóz qyzmeti.
Qasym-Jomart Toqaev dıalogtyń, senimdi nyǵaıtýdyń jáne jan-jaqty yntymaqtastyqtyń biregeı alańy retinde AÓSShK áleýetin keńeıtýge baǵyttalǵan Ázerbaıjan tarapynyń belsendi tóraǵalyǵyn oń baǵalady.
— Qazaqstan úshin Keńestiń mańyzy erekshe. Elimiz otyz jyldan asa ýaqyt buryn keń baıtaq óńirde ózara senimdi arttyrý jáne qaýipsizdikti qamtamasyz etýge septigin tıgizý maqsatynda osy forýmdy qurý jóninde bastama kótergen bolatyn. Sodan beri AÓSShK ózara tıimdi nátıjege qol jetkizý úshin múshe memleketterdi ortaq iske jumyldyryp keledi. Bastapqyda Azııadaǵy qaýipsizdikti saqtap, senimdi nyǵaıtýdy kózdeıtin jalpyǵa ortaq tikeleı dıalog formatynda qurylǵan bul alań búginde biregeı forýmǵa aınaldy. Uıymǵa múshe elder Azııa qurlyǵynyń shamamen 90 paıyzyn qamtıdy. Munda Jer shary turǵyndarynyń jartysynan astamy ómir súredi. Halyqaralyq ınstıtýttardyń kóbinde mundaı áleýet joq, — dedi Memleket basshysy.
Qasym-Jomart Toqaev bul formattyń aýqymy AÓSShK-niń zor áleýetin tanytatynyn, al ortaq bolashaq qurýǵa umtylǵan jalyndy jastar onyń qozǵaýshy kúshi sanalatynyn aıtty.
— Qaýipsiz ári gúldengen Azııa qurýǵa degen shynaıy nıetimizdi kórsetetin AÓSShK rýhy shyn máninde belgili brendke aınaldy. Búgin Laostyń osy Uıymǵa múshe bolǵanyna qýanyshtymyn, — dedi ol.
Budan buryn Prezıdent Qasym-Jomart Azııadaǵy ózara is-qımyl jáne senim sharalary jónindegi keńestiń 7-sammıtine qatysyp jatqanyn jazǵanbyz.
