Qasym-Jomart Toqaev álemdegi yqpaldy musylmandar tizimine endi
ASTANA. KAZINFORM — Qazaqstan Prezıdenti Qasym-Jomart Toqaev jyl saıyn jarııalanatyn The Muslim 500 — «Álemdegi eń yqpaldy 500 musylman» tizimine endi. Memleket basshysynyń esimi 2027 jylǵy basylymda saıası qaıratkerler sanatynda kórsetilgen.
Atalǵan tizimdi Iordanııada ornalasqan Koroldik ıslam strategııalyq zertteýler ortalyǵy (The Royal Islamic Strategic Studies Centre) jyl saıyn jarııalap otyrady.
Basylymda Qasym-Jomart Toqaev Political («Saıasat») sanatynda berilgen. Sonymen qatar maqalada 2022 jyly bastalǵan saıası ózgeristerge erekshe nazar aýdarylǵan. Qańtar oqıǵalarynan keıin Qasym-Jomart Toqaev «Jańa Qazaqstan» qurý bastamasyn kóterip, aýqymdy saıası reformalardy usynǵany atap ótilgen.
2022 jylǵy maýsymda ótken respýblıkalyq referendýmda Konstıtýtsııaǵa engizilgen ózgerister maquldandy. Bul túzetýler Prezıdenttiń ókiletin shekteýdi, Parlamenttiń rólin kúsheıtýdi jáne Prezıdenttiń jaqyn týystarynyń memlekettik qyzmette joǵary laýazymdarǵa ıe bolýyna tyıym salýdy kózdedi.
Sondaı-aq basylym avtorlary 2022 jylǵy qarashada ótken kezekten tys prezıdent saılaýynda Qasym-Jomart Toqaevtyń 81,31 paıyz daýys jınap, jeńiske jetkenin eske salǵan. Jańa Konstıtýtsııaǵa sáıkes, ol bir ret qana jeti jyldyq merzimge saılandy.
The Muslim 500 — álemniń túrli elderindegi musylman qaýymyna eleýli yqpal etip júrgen tulǵalar týraly jyl saıyn shyǵatyn basylym.
Tizimdi jasaý kezinde qoǵamdyq pikir, sarapshylardyń baǵasy, áleýmettik kórsetkishter men úmitkerlerdiń ómir boıy jetken jetistikteri eskeriledi. Tulǵalardyń yqpaly tek sandyq kórsetkishtermen ǵana emes, musylman qaýymyna tıgizgen uzaq merzimdi áserimen de baǵalanady.
Basylymǵa barlyǵy 500 adam engizilgen. Alǵashqy 50 qatysýshy reıtıngte naqty oryndarǵa ıe bolsa, qalǵan 450 adam saıasat, din, bıznes, ǵylym, mádenıet, qaıyrymdylyq, sport jáne basqa da salalardy qamtıtyn 13 sanatqa bólingen.
The Muslim 500 tarıhynda alǵash ret 2027 jylǵy shyǵarylymda birinshi oryndy bes tulǵa bólisti. Atap aıtqanda, Saýd Arabııasynyń koroli Salman bın Abdýlazız Ál Saýd, taq murageri ári Premer-mınıstr Muhammed bın Salman Ál Saýd, Pákistan Premer-mınıstri Mıan Muhammed Shahbaz Sharıf, Pákistan Qorǵanys kúshteriniń basshysy ári Armııa shtabynyń bastyǵy, feldmarshal Asım Mýnır jáne Túrkııa Prezıdenti Rejep Taııp Erdoǵan.
Basylym avtorlary mundaı sheshimge atalǵan saıası kóshbasshylardyń Saýd Arabııasy, Pákistan jáne Túrkııa arasyndaǵy qaýipsizdik salasyndaǵy yntymaqtastyqty damytýǵa qosqan úlesi sebep bolǵanyn túsindirgen.
Aıta keteıik, bıyl aqpanda Qasym-Jomart Toqaev Musylman aqsaqaldar keńesiniń jáne sheıh Zaıd atyndaǵy «Adamzat baýyrlastyǵy» syılyǵynyń Bas hatshysy Muhammed Ábdelsalammen kezdesken edi.
Eske salaıyq, buǵan deıin Memleket basshysy halyqaralyq arenada bedeldi ári irgeli ınstıtýttardyń biri sanalatyn Musylman aqsaqaldar keńesiniń elimizde júzege asyryp jatqan mańyzdy jobalary men bastamalaryna qoldaý bildirgen edi.
