Qasym-Jomart Toqaev: Alataý City jobasyn júzege asyrý — memlekettik mańyzy zor mindet

— Sóz sońynda myna máselege toqtalǵym keledi. Qalany kórkeıtý jumysy keshendi túrde júrgizilýge tıis. Bul — Qazaqstannyń barlyq qalalaryna qatysty mindet.

Arnaıy basqarý rejımin engizý, ınvestıtsııany qorǵaý jáne qajetti ınfraqurylymdy damytý isin bir-birinen bólek qarastyrýǵa bolmaıdy. Bul baǵyttardyń bári óte mańyzdy.

Mysaly, bastapqy ınfraqurylym bolmasa, ınvestıtsııa qorǵalmasa, halyqaralyq ınvestorlar munda kelmeıdi. Bul aıqyn nárse. Arnaýly quqyqtyq rejım bolmasa, ınnovatsııalyq tásilderdi engize almaımyz.

Shyn máninde, Alataý city jobasyn júzege asyrý — turmys sapasy jáne iskerlik ortasy eń joǵary álemdik talaptarǵa saı keletin ozyq qala salý degen sóz, — dedi Prezıdent.

Onyń aıtýynsha, bul — memlekettik mańyzy zor mindet, elimiz úshin strategııalyq máni bar jumys.

— Sondyqtan biz tyńǵylyqty, tııanaqty, sapaly jumys isteýimiz kerek. Qur qaǵaz júzindegi eseptiń esh qajeti joq.

Bárimizge keregi — bir-aq nárse: bul — naqty nátıje. Qajetti jaǵdaıdyń bári jasalyp jatyr. Tıisti quqyqtyq negiz bar, resýrs ta jetkilikti. Endi barlyǵy aldaǵy mindetterdiń ýaqtyly ári sapaly oryndalýyna tikeleı baılanysty bolady. Árbir baǵyt boıynsha jeke jaýapkershilik júkteledi.

Osy aýqymdy jobany birlesip, tabysty júzege asyramyz dep senemin, — dedi Memleket basshysy.

Aıta keteıik, ️Memleket basshysy bas qujatymyz el damýynyń qozǵaýshy kúshi bolýǵa tıis ekenin málimdedi.