187 myń jol tártibin buzý faktisi anyqtalǵan: Prezıdent Aqtóbeniń jedel basqarý ortalyǵyna bardy
AQTÓBE. KAZINFORM - Memleket basshysy Aqtóbe qalalyq polıtsııa departamentiniń jedel basqarý ortalyǵynyń ǵımaratyn aralap kórdi, dep habarlaıdy Aqordanyń baspasóz qyzmeti.
Nysan óńirdegi 15 myńǵa jýyq beınekamera arqyly jergilikti jerdegi ahýaldy naqty ýaqyt rejıminde táýlik boıy baqylaýǵa múmkindik beredi.
Ortalyqtyń jedel zalynda 32 ınspektor men «102» shuǵyl jelisiniń 3 operatory jumys isteıdi.
Qasym-Jomart Toqaevqa Іshki ister mınıstriniń orynbasary Sáken Sársenov polıtsııa qyzmetinde qoldanylyp jatqan tsıfrlyq jobalar týraly baıandady.
Qazir Aqtóbe oblysynda 5 jedel basqarý ortalyǵy jumys istep tur. Osy ortalyqtar arqyly óńirde 1,8 myń qylmystyq quqyq buzýshylyq ashylyp, 187 myń jol júrý erejesin buzý faktisi anyqtalǵan.
Sonymen qatar Prezıdentke ishki ister organdary qyzmetiniń tıimdiligin arttyrý úshin jasandy ıntellekt tehnologııasy qoldanyla bastaǵany týraly málimet berildi.
Atalǵan tehnologııa baqylaý kameralaryndaǵy beınege taldaý júrgizip, joǵalyp ketken azamattardy tabýǵa kómektesedi. Sonymen qatar arnaıy platformaǵa júktelgen fotosýretter arqyly kúdiktilerdiń bet-beınesin tanyp, qajetti málimetterdi de usynady. Budan bólek jol júrý erejesin buzý faktilerin tirkep, kólik qozǵalysyn qadaǵalaýǵa járdemdesedi.
Memleket basshysy osy baǵyttaǵy jumysty jalǵastyrý qajet ekenin aıtyp, qoǵamda zań men tártiptiń ústemdigin qamtamasyz etýdiń mańyzyna nazar aýdardy.
Memleket basshysy Aqtóbe oblysynyń áleýmettik-ekonomıkalyq damý barysymen tanysty.