Qasym-Jomart Toqaev AQSh prezıdentimen telefon arqyly mazmundy áńgime órbitti
ASTANA. KAZINFORM – Memleketter basshylary ekijaqty kún tártibi men halyqaralyq ahýal, sonyń ishinde Ýkraına problematıkasy jóninde pikir almasty. Bul týraly Aqordanyń baspasóz qyzmeti habarlady.
Qasym-Jomart Toqaev bıyl qarasha aıynda Vashıngtonǵa jasaǵan sapary kezinde qol jetkizilgen ýaǵdalastyqtardy tolyq iske asyrýǵa nıetti ekenin aıtty.
Qazaqstan Prezıdenti Ýkraına qaqtyǵysyn retteýdiń kúrdeli sıpatyna nazar aýdardy. Óıtkeni bul shıeleniste terrıtorııalyq kelispeýshilik basty máselege aınalyp otyr. Sondyqtan qazirgi naqty jaǵdaıdy eskere otyryp, eki jaqtyń mámilege kelýi mańyzdy.
Elimiz barlyq tarapty tózimdilik, ıkemdilik jáne kásibılik tanytyp, beıbitshilik formýlasyn izdeýdi jalǵastyrýǵa shaqyrady. Bul rette Qazaqstan araaǵaıyn emes, biraq qajet bolǵan jaǵdaıda kelissóz alańyn usynýǵa daıyn.
Qasym-Jomart Toqaev Donald Tramptyń kóshbasshylyq qasıeti arqasynda birqatar halyqaralyq áskerı qaqtyǵys toqtap, AQSh-tyń ishki áleýetin kúsheıtýde oń nátıjege qol jetkizilgenin atap ótti.
Memleket basshysy Amerıka prezıdentin ózine qolaıly ýaqytta Qazaqstanǵa saparmen kelýge shaqyrdy. Bul ekijaqty qarym-qatynastaǵy tarıhı ýaqıǵa bolatynyna senim bildirdi.
Eske sala keteıik, buǵan deıin AQSh prezıdenti Qasym-Jomart Toqaevqa jyly lebizin joldaǵanyn jazǵan edik.