Qasym-Jomart Toqaev AQSh elshisi Djýlı Stafftty qabyldady

ASTANA. KAZINFORM – Prezıdent Qasym-Jomart Toqaev Qazaqstan men Amerıka Qurama Shtattary arasyndaǵy ekijaqty kún tártibiniń aýqymdy máseleleri boıynsha yntymaqtastyq qarqyndy damyp kele jatqanyn atap ótti, dep jazdy Aqorda.

Memleket basshysy saýda-ekonomıkalyq jáne ınvestıtsııalyq yqpaldastyqty odan ári nyǵaıtýdyń, sondaı-aq joǵary deńgeıde qol jetkizilgen kelisimderdi sapaly iske asyrýdyń mańyzyna nazar aýdardy.

Elshi Prezıdent Donald Tramptyń rızashylyǵy men izgi tilegin jetkizip, Qurama Shtattardyń Qazaqstanmen keńeıtilgen strategııalyq seriktestikti jan-jaqty damytýǵa beıil ekenin aıtty.

Djýlı Stafft elimizde júrgizilip jatqan saıası reformalarǵa oń baǵa berip, jańa Konstıtýtsııa jobasy boıynsha jalpyhalyqtyq referendýmnyń tabysty ótýine tilektestigin bildirdi.

Áńgimelesý barysynda Beıbitshilik keńesi aıasyndaǵy qarym-qatynas perspektıvasy qarastyryldy. Qasym-Jomart Toqaev atalǵan qurylym turaqtylyqty nyǵaıtýǵa, beıbitshilik pen halyqaralyq dıalogty ilgeriletýge arnalǵan tıimdi alańǵa aınalýy qajet dep sanaıdy.

Aıta keteıik, Memleket basshysy «QazMunaıGaz» UK AQ basqarma tóraǵasy Ashat Hasenovti qabyldady.