Qasym-Jomart Toqaev Aqordada To Lamdy qarsy aldy
ASTANA. KAZINFORM — Memleket basshysy Qasym-Jomart Toqaev Aqordada Qazaqstanǵa memlekettik saparmen kelgen Vetnam Kommýnıstik partııasy Ortalyq Komıtetiniń Bas hatshysy To Lamdy qarsy aldy.
Aldymen Qasym-Jomart Toqaev pen To Lam bir-birine resmı delegatsııa múshelerin tanystyrdy. Osydan keıin mártebeli meımannyń saparyna oraı Saltanatty rásimder zalynda sap túzegen qurmet qaraýylynyń bastyǵy Memleket basshylaryna sálemdik baıanat berdi. Prezıdent orkestri eki eldiń memlekettik Ánuranyn oryndady.
Ánurandardy tyńdap bolǵannan keıin Qasym-Jomart Toqaev pen To Lam kilemshe boıymen Qazaqstan Respýblıkasynyń Memlekettik Týyna qaraı júrdi.
Onyń aldyna kelgende meıman toqtap, basyn sál ıip, óziniń qurmetin bildirdi. Sonan soń meıman men Prezıdent qurmetti qaraýyl sapynyń boıymen júrdi. Qurmetti qaraýyl bastyǵymen qoshtasty.
Qazirgi ýaqytta Aqordada joǵary deńgeıdegi kelissóz júrip jatyr.
Aıta keteık, joǵary deńgeıdegi kelissózder barysynda saýda-ekonomıkalyq, ınvestıtsııalyq jáne gýmanıtarlyq salalardaǵy qazaq-vetnam yntymaqtastyǵyn damytý perspektıvasy talqylanady.
Al 7 mamyr kúni Vetnam Kommýnıstik partııasy Ortalyq komıtetiniń bas hatshysy Jeńistiń 80 jyldyǵyna oraı Astanada ótetin áskerı paradty tamashalaıdy.
Buǵan deıin Vetnam premer-mınıstriniń orynbasary, syrtqy ister mınıstri Býı Than Shon Kazinform agenttigine eksklıýzıv suhbat berip, Qazaqstan-Vetnam qarym-qatynasynyń jaı-kúıi jaıly egjeı-tegjeıli aıtyp bergen edi.
Sondaı-aq, keıingi 30 jyldan astam ýaqytta eki el baılanysy qalaı nyǵaıdy? Kazinform analıtıkalyq sholýshysy osy taqyrypty taldap kórgen bolatyn.