Qasym-Jomart Toqaev Aqordada Natasha Pırts-Mýsardy qarsy aldy
ASTANA. KAZINFORM – Memleket basshysy Qasym-Jomart Toqaev Aqordada Qazaqstanǵa resmı saparmen kelgen Slovenııa Prezıdenti Natasha Pırts-Mýsardy qarsy aldy.
Aldymen Qasym-Jomart Toqaev pen Natasha Pırts-Mýsar bir-birine resmı delegatsııa múshelerin tanystyrdy. Osydan keıin mártebeli meımannyń saparyna oraı Saltanatty rásimder zalynda sap túzegen qurmet qaraýylynyń bastyǵy Memleket basshylaryna sálemdik baıanat berdi. Prezıdent orkestri eki eldiń memlekettik ánuranyn oryndady.
Ánurandardy tyńdap bolǵannan keıin Qasym-Jomart Toqaev pen Natasha Pırts-Mýsar kilemshe boıymen Qazaqstan Respýblıkasynyń Memlekettik Týyna qaraı júrdi. Onyń aldyna kelgende meıman toqtap, basyn sál ıip, óziniń qurmetin bildirdi. Sonan soń meıman men Prezıdent qurmetti qaraýyl sapynyń boıymen júrdi. Qurmetti qaraýyl bastyǵymen qoshtasty.
Qazirgi ýaqytta Aqordada joǵary deńgeıdegi kelissóz júrip jatyr.
Buǵan deıin Aqorda kelissóz barysynda saýda-ekonomıkalyq, ınvestıtsııalyq, kólik jáne mádenı-gýmanıtarlyq salalardaǵy ózara yntymaqtastyqtyń negizgi máselelerin talqylaý josparlanyp otyrǵanyn habarlaǵan edi.
Eki el arasyndaǵy kelissóz barysynda iskerlik baılanysty damytýǵa aıryqsha nazar aýdarylyp, Qazaqstan-Slovenııa bıznes-forýmy ótedi. Slovenııa ekojúıelerdi qorǵaý jáne ornyqty damý bastamalaryn belsendi túrde ilgeriletip keledi.
Bul sapar ekijaqty qarym-qatynasty arttyrýǵa, sonyń ishinde ekologııa, ekonomıka jáne gýmanıtarlyq bastamalardy nyǵaıtýǵa tyń múmkindik beredi.
