Qasym-Jomart Toqaev Aqordada Mońǵolııa Prezıdentin qarsy aldy
ASTANA. KAZINFORM – Memleket basshysy Qasym-Jomart Toqaev elimizge memlekettik saparmen kelgen Mońǵolııa Prezıdenti Ýhnaagıın Hýrelsúhty qarsy aldy.
Aldymen meımannyń kóligi Prezıdent Saraıynyń ortalyq basqyshyna kelip, uzyn kilemsheniń jıegine toqtady. Ol jerde meımandy Qazaqstan Prezıdenti Protokol qyzmetiniń qyzmetkeri kútip aldy. Aqordada Ýhnaagıın Hýrelsúhty Qasym-Jomart Toqaev qarsy aldy. Ózara sálemdeskennen keıin meıman men Prezıdent bir-birine delegatsııalaryn tanystyrdy.
Osydan keıin mártebeli meımannyń saparyna oraı saltanatty rásimder zalynda sap túzegen Qurmet qaraýylynyń bastyǵy Memleket basshylaryna sálemdik baıanat berdi.
Prezıdent orkestri eki eldiń memlekettik Ánuranyn oryndady.
Ánurandardy tyńdap bolǵannan keıin Qasym-Jomart Toqaev pen Mońǵolııa Prezıdenti kilemshe boıymen Qazaqstan Respýblıkasynyń Memlekettik Týyna qaraı júrdi.
Onyń aldyna kelgende meıman toqtap, basyn sál ıip, óziniń qurmetin bildirdi. Sonan soń Memleket basshylary Qurmet qaraýyl sapynyń boıymen júrdi. Qurmet qaraýyly bastyǵymen qoshtasty.
Joǵary deńgeıdegi kelissózder barysynda eki eldiń saıası, saýda-ekonomıkalyq jáne mádenı-gýmanıtarlyq yntymaqtastyǵyn nyǵaıtý perspektıvasy talqylanady.
Buǵan deıin agenttik sholýshysynyń «Qazaqstan - Mońǵolııa seriktestigi jańa kezeńge qadam basty» degen taqyryppen kólemdi maqalasy jarııalanǵan edi.
