Qasym-Jomart Toqaev Aqordada Sadyr Japarovty qarsy aldy
ASTANA. KAZINFORM — Búgin Memleket basshysy Qasym-Jomart Toqaev Qazaqstanǵa resmı saparmen kelgen Qyrǵyzstan Prezıdenti Sadyr Japarovty Aqordada kútip aldy.
Kórshi el Prezıdentiniń saparyna oraı saltanatty rásimder zalynda Qurmet qaraýyly sap túzep, onyń bastyǵy Memleket basshysy men mártebeli meımanǵa raport berdi.
Osydan keıin Prezıdent orkestri eki eldiń ánuranyn oryndady.
Qasym-Jomart Toqaev pen Sadyr Japarov bir-birine resmı delegatsııa múshelerin tanystyrdy.
Budan ári mártebeli meıman men Qasym-Jomart Toqaev kilemshe boıymen Qazaqstan Respýblıkasynyń Memlekettik týyna qaraı júrdi.
Onyń aldyna kelgende Sadyr Japarov toqtap, basyn sál ıip, iltıpatyn bildirdi.
Saltanatty rásimnen keıin Qazaqstan men Qyrǵyzstan prezıdentteri shaǵyn quramdaǵy kezdesýge ótti.
Sapar aıasynda búgin joǵary deńgeıde ekijaqty kelissóz júrgiziledi jáne birqatar mańyzdy qujatqa qol qoıylady dep josparlanyp otyr.
Aıta keteıik, 18 sáýir kúni Memleket basshysy Qasym-Jomart Toqaev Qazaqstanǵa resmı saparmen kelgen Qyrǵyzstan Prezıdenti Sadyr Japarovty elorda áýejaıynda kútip aldy.
Astanada Qasym-Jomart Toqaev pen Sadyr Japarov eki el ónerpazdarynyń gala-kontsertin tamashalady.
Sondaı-aq, elordada Qyrǵyz Respýblıkasynyń Prezıdenti Sadyr Japarovtyń resmı sapary aıasynda Qazaqstannyń mádenıet jáne óner qaıratkerlerine Qyrǵyzstannyń memlekettik nagradalaryn tapsyrý rásimi ótti.
