Qasym-Jomart Toqaev Aqordada Djordja Melonıdi qarsy aldy
ASTANA. KAZINFORM — Memleket basshysy Qasym-Jomart Toqaev Aqordada Qazaqstanǵa resmı saparmen kelgen Italııa Premer-mınıstri Djordja Melonıdi qarsy aldy.
Aldymen Qasym-Jomart Toqaev pen Djordja Melonı bir-birine resmı delegatsııa múshelerin tanystyrdy. Osydan keıin mártebeli meımannyń saparyna oraı Saltanatty rásimder zalynda sap túzegen qurmet qaraýylynyń bastyǵy Memleket basshylaryna sálemdik baıanat berdi. Prezıdent orkestri eki eldiń memlekettik Ánuranyn oryndady.
Ánurandardy tyńdap bolǵannan keıin Qasym-Jomart Toqaev pen Djordja Melonı kilemshe boıymen Qazaqstan Respýblıkasynyń Memlekettik Týyna qaraı júrdi.
Onyń aldyna kelgende meıman toqtap, basyn sál ıip, óziniń qurmetin bildirdi. Sonan soń meıman men Prezıdent qurmetti qaraýyl sapynyń boıymen júrdi. Qurmetti qaraýyl bastyǵymen qoshtasty.
Qazirgi ýaqytta joǵary deńgeıdegi kelissóz júrip jatyr.
Aıta keteıik, keshe Prezıdent Qasym-Jomart Toqaev Qazaqstanǵa resmı saparmen kelgen Italııa Premer-mınıstri Djordja Melonıdi elorda áýejaıynan kútip aldy. Memleket basshylary áýejaıynda az-kem áńgimelesti.
Sondaı-aq keshe elordada «Italııa — Qazaqstan» iskerlik forýmy ótip, eki eldiń uıymdary jalpy somasy 180 mıllıon eýro bolatyn 10 memorandýmǵa qol qoıdy.
Al búgin tústen keıin Memleketter basshylarynyń qatysýymen birinshi «Ortalyq Azııa – Italııa» sammıti ótedi.