Qasym-Jomart Toqaev Aqordada Abý-Dabıdiń Taq muragerin qarsy aldy
ASTANA. KAZINFORM — Memleket basshysy Qasym-Jomart Toqaev Aqordada Qazaqstanǵa resmı saparmen kelgen Abý-Dabıdiń Taq murageri sheıh Haled ben Muhammed ben Zaıd Ál-Nahaıandy qarsy aldy.
Aldymen Qasym-Jomart Toqaev pen Haled ben Muhammed ben Zaıd Ál-Nahaıan bir-birine resmı delegatsııa múshelerin tanystyrdy. Osydan keıin mártebeli meımannyń saparyna oraı Saltanatty rásimder zalynda sap túzegen qurmet qaraýylynyń bastyǵy Memleket basshylaryna sálemdik baıanat berdi. Prezıdent orkestri eki eldiń memlekettik Ánuranyn oryndady.
Ánurandardy tyńdap bolǵannan keıin Qasym-Jomart Toqaev pen Haled ben Muhammed ben Zaıd Ál-Nahaıan kilemshe boıymen Qazaqstan Respýblıkasynyń Memlekettik Týyna qaraı júrdi.
Onyń aldyna kelgende meıman toqtap, basyn sál ıip, óziniń qurmetin bildirdi. Sonan soń meıman men Prezıdent qurmetti qaraýyl sapynyń boıymen júrdi. Qurmetti qaraýyl bastyǵymen qoshtasty.
Qazirgi ýaqytta joǵary deńgeıdegi kelissóz júrip jatyr. Kelissózder barysynda Qazaqstan men BAÁ arasyndaǵy strategııalyq seriktestikti nyǵaıtý perspektıvasy talqylanyp, birqatar ekijaqty qujatqa qol qoıylmaq.
BAÁ – Qazaqstannyń arab álemindegi negizgi saýda-ekonomıkalyq seriktesi. Eki memlekettiń basshylyǵy taýar aınalymyn $1 mlrd-qa deıin ulǵaıtý jóninde birlesken sharalar qabyldaýda.
Abý-Dabıdiń Taq murageri sheıh Haled ben Muhammed ben Zaıd Ál-Nahaıan elordaǵa keshe kelgen edi.
