Qasym-Jomart Toqaev №2 Oqýshylar saraıyn aralap kórdi
ShYMKENT. KAZINFORM — Prezıdent Qasym-Jomart Toqaev Shymkent qalasyna barǵan issapar aıasynda №2 Oqýshylar saraıyn aralap kórdi. Bul týraly Aqorda málim etti.
— Zamanaýı qosymsha bilim berý ortalyǵynda mýltımedıa synyptary, zerthanalar, shyǵarmashylyq stýdııalary, kovorkıng aýmaqtary qarastyrylǵan. Munda erekshe qajettiligi bar balalar da emin-erkin bilim alady. Nysan Prezıdenttiń 2022 jyly qalaǵa kelgen kezinde bergen tapsyrmasyna sáıkes salynyp, paıdalanýǵa berilgen, — delingen habarlamada.
Búginde Oqýshylar saraıynda 5 myńǵa jýyq bala alty baǵyt boıynsha 65 úıirmege qatysady. Bilim berý baǵdarlamasy jan-jaqty damyǵan, jańasha oılaıtyn ári shyǵarmashylyq qabileti zor tulǵa qalyptastyrýǵa baǵyttalǵan.
Memleket basshysy ortalyqpen tanysyp shyqqan soń oqýshylarmen áńgimelesti.
Buǵan deıin habarlanǵandaı, Memleket basshysy Marai E7 Group óndiris alańynyń qyzmetimen tanysty.
