Qasıetti Muharram aıy bastaldy
ASTANA. 5 qarasha. QazAqparat - Keshe, ıaǵnı, qarasha aıynyń 4-i kúni Hıjra jyl sanaýy boıynsha jańa jyldyń alǵashqy kúnin bildiretin musylmansha muharram aıynyń alǵashqy kúni kirdi. Musylmansha jyl qaıyrý Paıǵambarlar padıshasy Muhammed Mustafanyń (Allanyń sálemi men ıgiligi jaýsyn!) jáne sahabalarynyń Mekke shaharynan Mádına qalasyna qonys aýdarǵan sátinen bastaý alady. Bul qazirgi qoldanystaǵy grıgorıan kúntizbesi boıynsha 622-shi jylǵa sáıkes keledi.
Musylmansha kúntizbedegi alǵashqy aı bolyp sanalatyn muharram aıy soǵys pen jaýlasýǵa tyıym salynǵan tórt aıdyń biri bolyp tabylady. Muharram aıynyń máni men mańyzy qasıetti Quran men hadısterde aıtylǵan. Sol sebepti, ár musylman bul aıda Jaratqan ıege barynsha jaqyndap, razylyǵyn alý úshin kóp qulshylyq etýi tıis. Imam Ǵazalı «Ihıa» dep atalatyn eńbeginde muharram aıyn ǵıbadatpen ótkizgen adamnyń jyl boıy berekege keneletinin jazyp ketken.
Múslımnen jetken sahıh hadıste bylaı aıtylǵan: «Ramazannan keıin eń qundy oraza mýharram aıynda tutylǵan oraza bolyp tabylady». Tabaranıden jetken ózge hadıste: «Muharram aıynda bir kún oraza ustaǵan jan 30 kún oraza tutqandaı saýap alady» dep aıtylǵan. Al, taǵy bir hadıste muharram aıynyń beısenbi, juma jáne jeksenbi kúnderi oraza ustaǵan adamnyń dárejesi kóterilip, mol saýapqa keneletini sóz bolǵan. Bul týraly muslim.kz habarlady.
