«Qasıetti Qazaqstan»: Jańa mýzeı-qoryqtardyń irgesi qalandy

NUR-SULTAN. QazAqparat - Qazaqstan Respýblıkasy Prezıdenti janyndaǵy «Rýhanı jańǵyrý» baǵdarlamasyn iske asyrý jónindegi ulttyq komıssııa otyrysynda «Qasıetti Qazaqstan» jobasy boıynsha jumys nátıjeleri jarııalandy, dep habarlaıdy QazAqparat tilshisi.

«Qasıetti Qazaqstan» jobasy sátti iske asyrylyp jatyr: osy kúnge deıin 28 tarıhı nysan qalpyna keltirilip, jańa «Bozoq», «Botaı», «Saraıshyq» mýzeı-qoryqtarynyń irgesi qalandy. Sonymen birge, Elbasynyń «Uly dalanyń jeti qyry» maqalasy aıasynda da birshama jobalar júzege asyrylý kezeńinde tur.

Jumys nátıjeleri týraly otyrys barysynda QR Prezıdent Ákimshiligi Memlekettik baqylaý jáne aýmaqtyq-uıymdastyrý jumysy bóliminiń jetekshisi Nurlan Saýranbaev, «Wikibilim» qoǵamdyq qory qamqorshylyq keńesiniń tóraǵasy Raýan Kenjehanuly, QR Prezıdent Ákimshiligi Іshki saıasat bóliminiń jetekshisi Aıda Balaeva, Nur-Sultan qalasynyń ákimi Baqyt Sultanov, Mádenıet jáne sport mınıstri Arystanbek Muhamedıuly, Bilim jáne ǵylym mınıstri Kúlásh Shámshıdınova, Aqparat jáne qoǵamdyq damý mınıstri Dáýren Abaev baıan etti.

Memlekettik hatshy Marat Tájın «Rýhanı jańǵyrý» baǵdarlamasyn ary qaraı júzege asyrý boıynsha jumysty údetý qajettigin aıtyp, birshama tapsyrmalar berdi. Ol tapsyrmalardyń júzege asyrylýy QR Prezıdenti Ákimshiligi men Ulttyq komıssııanyń turaqty baqylaýynda bolmaq.

Eske sala ketsek, búgin Aqordada Qazaqstan Respýblıkasy Prezıdenti janyndaǵy «Rýhanı jańǵyrý» baǵdarlamasyn iske asyrý jónindegi ulttyq komıssııa otyrysy ótti.