«Qasıetti Qaǵbanyń Syr boıyndaǵy kóshirmesi» - respýblıkalyq basylymdarǵa sholý

***

Mańǵystaý men Batys Qazaqstan oblysyndaǵy atqarylyp jatqan sharalarmen jiti tanysqan Úkimet basshysy Kárim Másimov keshe Aqtóbe oblysyna at basyn tirep, óńirdiń ekonomıkalyq, áleýmettik damýy men údemeli ındýstrııalyq-ınnovatsııalyq jáne «Bıznestiń jol kartasy - 2020» baǵdarlamalarynyń júzege asyrylý barysymen tanysty. Osyǵan oraı «Egemen Qazaqstan» gazetiniń senbilik nómirinde «Óndiristi óńirde qıyndyqtar az emes» degen taqyryppen kólemdi maqala basyldy. Basylymnyń atap ótýinshe, Premer-Mınıstr oblystyq kópsalaly balalar aýrýhanasynyń, «Aqtóbeniń metall emes qubyrlar zaýyty» AQ-nyń, «Aqtóberentgen» kásipornynyń, «Aıs» JShS taýarly-sút fermasynyń, sondaı-aq taǵy da birqatar nysandardyń tynys-tirshiligimen tanysqan. Jarııalanymnyń tolyq nusqasyn oqyǵyńyz kelse el gazeti «Egemen Qazaqstannyń» búgingi nómirine nazar aýdaryńyz.

«Qysylǵanǵa qol ushyn sozýǵa daıyn turatyn halqymyzdyń qasıeti bul kúnde baýyrlas Qyrǵyzstandaǵy jaǵdaıǵa baılanysty taǵy bir tanylyp otyr. kórshi eldi qıyndyqtan shyǵarýǵa, qoltyqtan demeýge barynsha kómek-qoldaý jasalyp jatqany málim. Sonyń jarqyn aıǵaǵy Qaraǵandydan Osh jáne Jalalabad qalalary turǵyndaryna arnalyp 2 vagonǵa lyq toltyra qaraqumyq tıelýi boldy», dep jazady «Egemen Qazaqstan» gazeti «Qyrǵyzdarǵa kómektiń aldy tıeldi» degen taqyryppen jarııalanǵan maqalasynda. Basylymnyń atap ótýinshe, atalǵan 188 tonna taǵam túriniń 128 tonnasy oshtyqtarǵa, al 60 tonnasy jalalabadtyqtarǵa jetkizilmek.

***

Bizdiń qoǵamda kompıýter oıyndaryna qatysty qalyptasqan pikir áralýan. Muny jahandaný protsesi arqyly negizdelgen qalypty qubylys sanaıtyndar «kompıýter oıyndaryn tek qana atys-shabys dep túsinbeý kerek, olardyń arasynda adamnyń ıntellektýaldyq deńgeıin arttyratyndaı óreli dúnıeler de bar» dep eseptese, kelesi bir top «keıingi ýaqytta jastar arasynda kóbeıip ketken toptasyp tóbelesý, qaraqshylyq shabýyl, nashaqorlyq sııaqty keleńsiz kórinisterdiń bári sol maǵynasyz kompıýter oıyndarynan alǵan áserden týyndaıdy. Óıtkeni jetkinshek júregine qatygezdik dánin sebý jaǵynan birinen-biri asyp túsetin kompıýterlik oıyndar jas óskinderdiń sanasyn meılinshe ýlap jatyr» degen pikirde. Osy oraıda, kompıýter oıyndary keleshek urpaq damýyna shynymen de keri áser ete me degen suraq týyndaıdy. Bul saýaldardyń jaýabyn bilgińiz kelse «Alash aınasy» gazetiniń «Oı-kókpar» aıdarynda osy taqyrypta oı qozǵaǵan saıasattanýshy Rasýl Jumaly, kınorejısser Qalıla Omar jáne psıholog Jaras Seıitnurlardyń paıymdaryn sholyp shyǵyńyz.

Qadym zamannan beri qazaq jerinde qupııasyn tarıhtyń qoınaýyna búkken qasıetti oryndar jeterlik. Ókinishtisi, olar jaıynda keıingi urpaq tam-tumdap qana biledi. Bálkim, nasıhattyń azdyǵynan shyǵar. Baǵzy kezeńnen beri ońtústik ólkede sylań qaǵyp aqqan Syrdyń boıynda syry ashylmaǵan oryndar bar. Sonyń biri - Qyzylorda oblysynyń Jańaqorǵan aýdany tusynda jatqan Qaǵbanyń kóshirmesi. Saýd Arabstanynda qonys tepken bul qasterli orynnyń kóshirmesi nelikten Syr topyraǵynda jasalǵan? Eskiden jetken esti áńgimege qulaq túrseń, atalmysh saýaldyń túıinin tarqatý qıynǵa soǵa qoımaıdy. Bul jóninde «Alash aınasy» gazetiniń senbilik sanyndaǵy «Qasıetti Qaǵbanyń Syr boıyndaǵy kóshirmesi» atty maqaladan jan-jaqty oqyp bilýge bolady.

Semeı qalasynyń irgesindegi Novopokrovka aýylynyń týmasy Toqtar Qurmýrzın Shyǵys Qazaqstan oblysynyń Abaı aýdanyndaǵy Sarjal aýylynyń bir qystaǵynda 20 jyl boıy quldyqta bolyp, jyldyń tórt mezgilinde tańerteńnen keshke deıin qoı baqqan. Qojaıyny shilińgir ystyq pen qaqaǵan aıazdaǵy eńbektiń aqysyna tek tamaqtandyryp otyrǵan. Qarııanyń qıyn taǵdyry «Alash aınasy» gazetinde jarııalanǵan «20 jyl quldyqtyń qamytyn kıgen aqsaqal» atty maqalada jan-jaqty baıandalady.

***

Keshe elorda ákimdiginiń ǵımaratynda Astana qalalyq kásipkerlik jáne óndiris basqarmasynyń kómegimen QR Ádilet mınıstrliginiń Qylmystyq atqarý júıesi komıteti «Eńbek» memlekettik kásiporny fılıaldarynyń óndiristik taýarlar kórmesi ótti. «Astana aqshamy» gazetiniń jazýynsha, kórmege elimizdiń túzeý mekemelerinde jazasyn ótep jatqan azamattardyń qoldarynan shyqqan qurylys materıaldary, qosalqy jóndeý bólshekteri, metall buıymdar, kóshe shamdary men oryndyqtar, kommýnaldyq-turmystyq buıymdar, balalar oıyn alańdaryna qajetti jabdyqtar, keńse jıhazdary, qyzmet kórsetý salasynyń kıimderi, tósek jabyndylary, qolóner buıymdary qoıylǵan.

«Astanada Malaızııanyń AmanahRaya memlekettik qarjylyq toby men «Qazaqstannyń damý banki» AQ, sondaı-aq «FATTAH FINANCE» AQ-nyń tıisti kelisimge qol qoıýy nátıjesinde taıaý kúnderde qazaqstanda taǵy bir Islam banki qurylatyn bolady», dep jazady «Astana aqshamy» gazeti. Islam banki elimizde bir jyldyń ishinde qurylyp, bas keńsesi Almatyda ornalaspaq. Jalpy, aǵymdaǵy jyly Abý Dabıdegi áriptestermen birlese Qazaqstanda alǵashqy ıslamdyq «Al Hilal» banki qurylǵan edi. Al, «FATTAH FINANCE» AQ sharıǵat normalaryna sáıkes qarjylyq qyzmet kórsetetin Qazaqstandaǵy birinshi kompanııa bolmaq.

***

QR Bilim jáne ǵylym mınıstrligi Qazaqstannyń mektep oqýshylarynyń qyzyǵýshylyq sheńberine qatysty kóńil jabyrqatarlyq derekterdi jarııa etti, dep jazady «Kazahstanskaıa pravda» gazeti «Belsendilik, jaýapkershilik, patrıotızm» degen taqyryppen jaryq kórgen maqalasynda.

Keshe Astanada ótken QR Prezıdenti janyndaǵy Jastar saıasaty jónindegi keńestiń kezekti VI otyrysynda sóz sóılegen atalǵan vedomstvonyń vıtse-mınıstri Serik Yrsalıevtiń atap ótýinshe, mektep oqýshylarynyń 16 paıyzy ǵana saıasatqa qyzyǵýshylyq tanytsa, olardyń 26 paıyzy ǵana mádenıetti qoǵamnyń qundylyǵy retinde tanıdy eken. Sondaı-aq onyń keltirgen derekterine qaraǵanda, jyl saıyn 20 myńǵa jýyq jasóspirim quqyq qorǵaý organdarynyń nazaryna iligýde.

«Qazaqstandyq hakerler batysqa tynyshtyq bermeýde. Bizdiń elimiz qatardaǵy paıdalanýshylardyń kompıýterlerine shabýyl jasaýshylar serverleri sany boıynsha kósh basyndaǵy memleketterdiń qataryna qosylyp otyr», dep jazady «Ekspress-K» gazeti «Bolashaqtyń energııasy» degen taqyryppen basylǵan maqalada. Jarııalanymnyń tolyq nusqasyn oqyǵyńyz kelse atalǵan basylymnyń senbilik sanyna nazar salyńyz.