Qasıetti Qaǵba mańy tegin ınternetpen qamtyldy
ASTANA.QazAqparat - Islam áleminiń basty aýmaǵy «ál-Haram» meshiti men Qaǵba mańy túgeldeı tegin ınternetpen qamtyldy. Qos kıe basqarmasy aqparattyq tehnologııa ortalyǵynyń dırektory Bandar ál-Kýzaımnyń aıtýynsha, bul qajylarǵa jasalar jaǵdaıdyń tek biri ǵana, dep habarlanǵan «Nur Astana» meshitiniń saıtynda.
Ortalyq dırektory jańa joba musylmandardyń naqty jergilikti ýaqyt boıynsha ákimshilikpen baılanysyp, kerekti aqparatqa qol jetkizýin maqsat etetinin aıtty. Al qajylyq rásiminde táýap etýshi musylmandar úshin óz smartfondarynda Qaǵbany qansha ret aınalýy kerektigi týraly málimetter kórsetiledi. «Biz buǵan qosa jańa mobıldi qosymshany da iske qostyq. Ol arqyly kez kelgen musylman keshki aýyzashar asyna tapsyrys bere alady. Tapsyrysty dál «ál-Haram» meshitinde otyrsańyz da jetkizip beredi», - deıdi ál-Kýzaım. Kelesi bir erekshe múmkindik - ıǵtıkaf qulshylyǵyna elektrondy túrde tirkelý. Meshitte ótetin osy qulshylyq rásimine ázirge arab, aǵylshyn, túrik, ýrdý, parsy jáne frantsýz tilderinde tirkelýge bolady.
