Qasıetti Áýlıeata jeriniń tarıhyn qurmet tutýymyz kerek - Berdibek Saparbaev

TARAZ. QazAqparat – Jambyl oblysynyń ákimi Berdibek Saparbaev oblys ortalyǵyndaǵy birqatar qurylys alańdaryn aralap, «Kóne Taraz» tarıhı-etnomádenı kesheninde boldy, dep habarlaıdy QazAqparat oblys ákimdiginiń resmı saıtyna silteme jasap.

«Kóne Taraz» kesheninde Berdibek Saparbaev «Qoǵamdyq kelisim» KMM Dostyq úıiniń jumysymen tanysty. Dostyq úıi oblys ortalyǵynyń kórikti oryndarynyń biri bolyp tabylady. Erekshe ǵımarat Qazaq handyǵynyń 550 jyldyǵyna oraı salynǵan. Búginde munda etnomádenı birlestik ortalyqtary, medıatsııa kabınetteri, oqýshylarǵa arnalǵan shyǵarmashylyq úıirmeler jumys isteıdi.

Ǵımarattyń foıesinde ártúrli kórmeler jıi ótip turady desek, al májilis zalynda is-sharalar uıymdastyrý daǵdyǵa aınalǵan. Degenmen nysandaǵy barlyq kabınetter tolyǵymen paıdalanylyp otyr deı almaımyz.

Jambyl oblystyq Qazaqstan halqy Assambleıasy tóraǵasynyń orynbasary, Hatshylyq meńgerýshisi Marjan Qojaevanyń jańbyr jaýǵanda shatyrdyń keı bólikterinen sý aǵatynyn jetkizdi. Jylý júıesiniń de jumysy oıdaǵydaı emes. Sondaı-aq, ǵımarattyń qasbeti jóndeýdi qajet etedi.

Sonymen qatar Berdibek Saparbaev Dostyq úıiniń janynda ornalasqan sholý munarasynyń alańdatarlyq jaǵdaıyna nazar aýdardy. Osy oraıda tıisti oryndarǵa barlyq máselelerdi zerttep, olardy sheshý úshin egjeı-tegjeıli josparyn usynýdy tapsyrdy.

Odan keıin aımaq basshysy ashyq aspan astyndaǵy arheologııalyq saıabaq-murajaıda boldy. Mýzeıde qundy arheologııalyq jádigerler saqtaýly jáne onda kóne Taraz qalasynyń hamam-monsha, medrese, kerýen saraı, magıstraldy kóshe, sýarý jáne sý qubyry júıesi, turǵyn jáne qolóner aýmaǵy syndy oryndaryn tamashalýǵa bolady. Bul jerge týrıster úlken qyzyǵýshylyq tanytýda.

Dese de keshendi odan ári tartymdy etý úshin nysanǵa sý ótýden saqtaıtyn qaýipsizdik jáne jaryqtandyrý júıelerin ornatý qajet. Ákimshilik ǵımaratynda, syz jáne qarańǵy jertólede shamamen myńjyldyq tarıhy bar qundy jádigerler saqtalyp tur.

Berdibek Saparbaev arheologııalyq saıabaq-murajaı men onyń ákimshilik korpýsyn jónge keltirýdi tapsyrdy.

– Taraz qoınaýynda ekimyńjyldyq tarıh jasyrýly jatyr. Bizdiń mindet – osy murany keler urpaqqa jetkizý. Biz kıeli Áýlıeata jeriniń baı tarıhyn umytpaı, oǵan qurmetpen qaraý kerekpiz, – dedi ó ńir basshysy .

Sondaı-aq ol olqylyqtardy joıyp, keshen aýmaǵyn tazalap, kógaldandyrýdy tapsyrdy.