Kásibiniń násibin kórip júrgen jastardyń kóptigi qýantady - jas ustaz
«Eń aldymen, elimizde jas bolsa da bas bolyp, óz kásibiniń násibin kórip jatqan jáne kóptegen otandastarymyzdy eńbekpen qamtamasyz etip otyrǵan jańashyl kásipkerlerdiń ósip kele jatqany qýantty. Olar qazaq qoǵamyna paıdasyn meılinshe kóp tıgizetin tetikterdi tabý jolyn ǵylymı negizde zerttep, bilim jetildirýge qulshynatyny mereıimdi ósiredi. Sonyń ishinde meniń bıylǵy túlekterime aıryqsha áser etken eki kórinis boldy. Olar - Almaty qalasyndaǵy NZM oqýshysy Ivan Krepak pen Qazaq-Brıtan tehnıkalyq ýnıversıtetinde oqıtyn 13 jasar ónertapqysh Abzal Myrzash baýyrymyzdyń ǵylymı jańalyqtary. Jas ónertapqyshtardyń qajyrly eńbegi men tereń bilimi kóptegen órenderge ónege ǵana bolyp qoımaı, olardyń júregine bir erekshe úmit otyn uıalatty dep túıdim. Sebebi, sol mezette zalda otyrǵan oqýshylardyń janarynan «men de osyndaı jetistikke jetsem» degen ushqyn kóringendeı sezildi»,-deıdi Nartaı.
Nartaı Sholtyqtyń aıtýynsha, erkin elimizdiń eńsesin odan ármen bıiktetý úshin, qazaq degen ulttyń terezesin álemniń damyǵan elderimen teń etýge úles qosqymyz kelse, artymyzda ólmeıtin sóz ne is qaldyrýdy murat tutý kerek.
«Tól ádebıetimiz ben ata mádenıetimizdi jańǵyrtatyn, álemge pash ete alatyn Mereı Qart, Aısholpan Nurǵaıypqyzy sekildi baýyr-qaryndasymnyń jumyr júrekteriniń lúpili kúlli álemdegi ıisi qazaqtyń rýhyn bir kóterip tastaǵandaı boldy. Iá, rasymen de Altaıdaǵy az ǵana qazaqtyń amanatyn arqalap kelgen búrkitshi qaryndasymyzdyń jan tebirenter sózi búkil júregi bar adamnyń janaryna jas úıirdi dep oılaımyn. Qazaqtyń qara domalaq Abzalynyń 1 mınýtta 1200 kitapty kırılden latynǵa aýdaratyn ónertýyndysyn álemge pash eter bolsaq, Aısholpan qaryndasymyzdyń álemniń múıizi qaraǵaıdaı Oxford, Harvard syndy bilim ordasynan arnaıy shaqyrtý alǵanyn eskerer bolsaq, onda dál osy jastarǵa uqsap baqqysy keletin osy zamannyń bilimi kemel kemeńgeri ósip-jetileri sózsiz», - dep oıyn túıindedi jas ustaz.
