«Kásibińe basymdy ıem» uranymen Medıtsına qyzmetkeri kúni atalyp ótti
ASTANA. QazAqparat - Ár adam óz ómir jolynda aq halatty abzal jandarmen kezdesip, olardyń ystyq yqylasy men kásibı biliktiliginiń múmkindikterin alyp otyrady. Bunyń bárin medıtsına qyzmetkerleri ǵana bere alady. Olardyń kómegimen toqtaǵan júrek qaıta soǵyp, úmitimizdi jalǵap syzdaǵan baltyrymyz jazylady.
Medıtsına qyzmetkerleriniń úzdik tájırıbesi, ozat kásiptiligi, tereń bilimderi men asqan sheberligi, olarǵa tán adamnyń ómiri men densaýlyǵy úshin jaýapkershiligi barlyq ózgerister men qoǵamnyń turaqty damýynyń kepili.
18 maýsym kúni Qazaqstanda Medıtsına qyzmetkerleriniń kúni atap ótiledi. Osy oraıda, biz elimizdiń barlyq medıtsına qyzmetkerleriniń tynymsyz eńbeginiń arqasynda 2016 jyly kezeń-kezeńmen «Densaýlyq» Memlekettik baǵdarlamasynyń negizgi ındıkatorlaryna qol jetkizgenimizdi aıta ketý kerek.
Statıstıkaǵa súıenetein bolsaq, kún saıyn jarty mıllıonnan astam qazaqstandyqtar dárigerlerge júginip, 8 myńǵa jýyq patsıent túrli statsıonarlarda emdeledi. Oǵan qosa, kúndelikti 1100-den astam áıel sábıli bolyp, ana atalady. Al hırýrg mamandar bolsa, kúnine 2 myń 200-den astam patsıentke operatsııalar jasaıdy. Sondaı-aq, kún saıyn jedel járdem 20 myń 700 retten astam naýqastardyń shaqyrýlaryna barady.
Memlekettiń basty baılyǵy adam desek, árbirimizdiń aman-saýlyǵymyzdy baqylaıtyn ol árıne, aq halatty abzal jandar.
Búgingi tańda elimizdiń densaýlyq jaǵynan jáne ómir súrý uzaqtyǵy tarapynan kórsetkishter elimiz egemendigin alǵan alǵashqy on jylǵa qaraǵanda jaqsy. Naqtyraq aıtsaq, respýblıka aýmaǵynda keıingi on jylda ómir súrý uzaqtyǵy 72 jasqa jetti. Ana ólimi 10 jylda 3,2 ese azaıdy. Sábı ólimi 2016 jyly týǵan 1000 balaǵa 8,6 qurady. Júrek-qantamyry aýrýlarymen naýqastaný men ólimi tómendedi. 2015 jylmen salystyrǵanda qaterli isik aýrýlarymen naýqastaný men ólimi azaıdy. On jylda jaraqat pen ulanýdan ólim eki ese tómendedi. 22 ınfektsııalyq aýrýlarymen naýqastaný da azaıdy. Qoryta aıtqanda, ómir súrý uzaqtyǵy, halyq densaýlyǵynyń ındeksi, halyqtyń medıtsınalyq kómektiń sapasyna qanaǵattanýshylyq deńgeıi sııaqty negizgi medıtsınalyq-demografııalyq kórsetkishteriniń jaqsarǵanyn kórýge bolady. Bul sandar medıtsına qyzmetkerleriniń ereń eńbeginiń jáne júzdegen, myńdaǵan qutqarylǵan ómirlerdiń aıǵaǵy.
Búgingi tańda Elbasymyz Nursultan Nazarbaevtyń Halyqqa Joldaýynan elimizdiń álemdegi damyǵan 30 eldiń qataryna kirý maqsaty turǵandyǵy barlyǵymyzǵa aıqyn. Atap keterligi, damyǵan 30 memlekettiń qataryna kirý mindetin sheshý úshin respýblıkamyzda barlyq jaǵdaılar bar. Degenmen, densaýlyq saqtaý salasyn jańa sapaly deńgeıge shyǵarý úshin árbir medıtsına qyzmetkeri óz jumys ornynda osyǵan barynsha óziniń eńbegi men bilimin salǵany abzal.
Medıtsına qyzmetkerler kúnine arnalǵan negizgi saltanatty is-shara 16 maýsymda Astana Operada ótti. Onda «Úzdik dáriger», «Úzdik aýyl dárigeri», «Úzdik provızor», «Úzdik tehnıkalyq kásibı bilimi bar medıtsına qyzmetkeri», «Úzdik menedjer - densaýlyq saqtaýdyń uıymdastyrýshysy», «Úzdik medıtsınalyq JOO oqytýshysy», «Sanıtarııalyq-epıdemıologııalyq salasynyń úzdik dárigeri», «Sanıtarııalyq-epıdemıologııalyq saraptamanyń úzdik mamany» sııaqty nomınatsııalar boıynsha ataqtar berildi.
Aıta keteıik, elimizdiń medıtsına uıymdarynda 65 822 dáriger, 158 741 orta medıtsınalyq qyzmetkerler jumys isteıdi.
