Kásibı jáne áýesqoı fotograftar arasynda respýblıkalyq baıqaý ótedi
ALMATY. Qazannyń 5-i. QazAqparat /Erlik Erjanuly/ - Soros-Qazaqstan qory kásibı jáne áýesqoı fotograftar arasynda "Qazaqstan iri planda - 2010" dep atalatyn respýblıkalyq baıqaý jarııalady, dep habarlaıdy QazAqparat.
Oǵan jasy 18-den asqan kez-kelgen Qazaqstan azamaty qatysa alady. Sharanyń basty maqsaty - barlyq tilek bildirýshilerge fotografııalardyń kómegimen qazirgi zamanǵy Qazaqstandy kórsetýge múmkindik berý. Baıqaýdyń taqyryptyq baǵyttary: "Óndirýshi aımaqtar: arman men shyndyq", "Aımaqtardyń qarama-qarsylyqtary (kontrasty)", "Men - kýágermin", "Qazaqstannyń jańa býyny", "Fokýste: qarapaıym jandar", "Qazaqstan reporterleri". Oǵan qatysý úshin úmitkerler óz ótinishteri men túsirgen 5 fotografııasyn qarashanyń 15-ine deıin "Fotobaıqaýǵa" degen belgimen uıymdastyrýshylarǵa joldaýy kerek. Saraptamalyq komıssııa synynan ótkender: "Úzdik áýesqoı fotograf", "Úzdik kásibı fotograf" jáne "Yntalandyrý" syılyǵymen marapattalady. Onda úzdikter 100 myń teńgeden, al yntalandyrý syılyǵyn ıelengender 50 myń teńgeden ıelenetin bolady. Baıqaý qorytyndysy boıynsha jeńimpazdardyń esimi jeltoqsannyń 6-sy kúni jarııalanady.
