Kásibı psıhologtar áskerı qyzmetshilermen trenıng ótkizdi
Áskerı qyzmetshilerdiń otbasy múshelerimen jumys jónindegi qyzmet pen psıhologııalyq jáne áleýmettik qyzmet ofıtserleri birlese kásibı psıhologtardy shaqyryp, túrli problemalyq máselelerdi sheshýge baǵyttalǵan trenıngterdi udaıy ótkizip turady.
Áskerı qyzmetshilerdiń moraldyq-psıhologııalyq jaı-kúıi - Qazaqstan Qarýly Kúshterindegi tárbıeshi-ofıtserlerdiń jumysyndaǵy mańyzdy baǵyttardyń biri. Sebebi, bul baǵyt jaýyngerlik rýhqa, áskerı qyzmetshilerdiń ártúrli oqý-jaýyngerlik tapsyrmalardy oryndaý ázirlikterine yqpal etedi. Daýly jaǵdaıda ne isteý kerek, sheshim durys nemese burys qabyldandy ma - kásibı psıholog ofıtserler men olardyń otbasy múshelerine osy jáne ózge de suraqtarǵa jaýap tabýǵa árdaıym kómek beredi.
Psıholog ofıtserler komandırlerge jeke quramnyń moraldyq-psıhologııalyq jaı-kúıiniń deńgeıin qadaǵalap, retke keltirýge qolǵabys etedi.
«Áskerı qyzmetshilerdiń otbasy múshelerimen jumys jónindegi qyzmet ókilderi uıymdastyrǵan trenıngterdiń birine Taraz garnızonynyń garnızondyq ofıtserler úıine pedagogıka ǵylymdarynyń kandıdaty, professor, ınnovatsııalyq tehnologııalar men jaratylystaný-ǵylymı gýmanıtarlyq pánderdi oqytý ádistemesi kafedrasynyń meńgerýshisi, psıholog Chınara Toıǵanbekova shaqyryldy. Qyzyqty úlgide ótkizilgen trenıng áskerı qyzmetshilerdiń shyǵarmashylyq jáne sheshendik qabiletterin asha túsýge, kóshbasshylyq qasıetterin nyǵaıtýǵa múmkindik berdi», - delingen mınıstrlik habarlamasynda.
