Kásibı patronattyq otbasyn qurý jobasy ázirlenip jatyr
Jańa joba aıasynda jetimder men ata-anasynyń qamqorlyǵynsyz qalǵan balalardy balalar úıine emes, birden patronattyq otbasyna berý múmkin bolmaq. Bul balalardyń asyrap alýshy ata-analaryn tez taýyp, úıde beıimdelýi úshin qajet.
«Atalǵan shara Memleket basshysynyń «Ádiletti Qazaqstan: bárimiz jáne árqaısymyz úshin. Qazir jáne árdaıym» atty saılaýaldy baǵdarlamasy aıasynda júzege asyrylyp jatyr. Prezıdent atap ótkendeı, biz azamattardyń bilimi, densaýlyǵy men ál-aýqatyna jaýaptymyz. Búgin elimizde bala asyrap alýdan bólek, balalardy otbasyna ornalastyrýdyń qorǵanshylyq, qamqorshylyq, patronattyq tárbıe, patronattyq otbasy sııaqty túrleri bar. Alaıda, aýyr derti jáne damýynda keıin qalýshylyq bar sábıler balalar úılerinde qalady. Bul balalardyń otbasynda tárbıe alý múmkindigine ıe bolýy úshin densaýlyq jaǵdaıyna qaramastan, barlyq balany qabyldaýǵa daıyn kásibı patronattyq otbasylar ınstıtýty qurylady. Qazir Oqý-aǵartý mınıstrligi kásibı patronattyq otbasylardy zańnamalyq turǵydan bekitý jumysymen aınalysyp jatyr», - dedi Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.
Kásibı patronattyq tárbıeshilerge qoıylatyn talaptardy, psıhologııalyq daıyndyq baǵdarlamasyn, áleýmettik kepildikter men tólemder tizbesin jáne t.b. ázirleý jumystary júrgizilip jatyr.
Balalardy kásibı patronattyq otbasyna 3 aıǵa deıin qysqa merzimge jáne 3 aıdan kámeletke tolǵanǵa deıin uzaq merzimge berýge bolady dep josparlanyp otyr. Balalardy tárbıeleýge berý kelisim negizinde júzege asyrylady. Asyrap alýshy ata-analar balalarynyń sanyna jáne olardyń otbasynda bolý merzimine baılanysty óz eńbegi úshin aqy alady.
