Kásibı merekesi qarsańynda prokýratýra qyzmetkerleri Astanada 110 páter ıelendi
Bas prokýratýrada ótken saltanatty jınalysta Qazaqstan Respýblıkasynyń Bas Prokýrory Ashat Daýylbaev sóz sóıledi.
«Turǵyn-úı qurylys jınaq banki» jáne «Samuryq-Qazyna» qorynyń qatysýymen Astana qalasynda qonystanǵan prokýratýra organdary qyzmetkerlerine arnalǵan kóp qabatty turǵyn úı salyndy. Osy aptanyń basynda 110 páterdiń kilti tapsyryldy», dedi ol.
Jańa jyldyq meıramdardy prokýratýra qyzmetkerleriniń otbasylary jańa páterlerde qarsy alady dep kútilýde. Sonymen qatar «Qoljetimdi baspana-2020» memlekettik baǵdarlamasy aıasynda Almaty, Ońtústik Qazaqstan jáne Shyǵys Qazaqstan oblystarynda 3 kópqabatty turǵyn úıdiń qurylysy aıaqtalýǵa jaqyndady.
Bas prokýrordyń aıtýynsha, qadaǵalaý praktıkasyn eskere otyryp, memlekettik basqarý júıesin, prokýratýra organdaryn qosa alǵandaǵy sot tóreligin reformalaý, sondaı-aq zańdylyqtyń ústemdigi qaǵıdalaryn qamtamasyz etý boıynsha usynystar ázirlendi jáne olardy Jańǵyrtý jónindegi Ulttyq komıssııa qoldady.
Jyl basynan beri elimizdiń quqyq qorǵaý júıesiniń qylmystyq jáne ákimshilik zańnamanyń jańa modeli sheńberinde jumys istep kele jatqany atap ótildi.
Sotqa deıingi tergeýdiń biryńǵaı tizilimi jańadan quryldy, onda qylmystyq quqyq buzýshylyqtyń belgileri bar aryzdar men habarlamalardyń barlyǵy tirkeledi.
«Protsessýaldyq prokýrorlar ınstıtýty tergeýge prokýrorlyq qadaǵalaýdyń tıimdiligin arttyrýǵa jaǵdaı jasady. Batys jáne Ortalyq Eýropa elderine erekshe nazar aýdara otyryp júrgizilgen halyqaralyq yntymaqtastyq salasyndaǵy prokýratýra organdarynyń jumysy Memleket basshysynyń oń baǵasyn aldy. Tutastaı alǵanda keıingi jyldary bizder 20 halyqaralyq kelisimshart jasasyp, Qazaqstannyń quqyqtyq bazasyn sapalyq jáne sandyq jaǵynan jaqsarttyq. AQSh jáne Ulybrıtanııamen jasalǵan quqyqtyq kómek týraly sharttar Qazaqstannyń amerıkaaralyq jáne eýropalyq konventsııalarǵa qosylý rásimin jyldamdatady», - dedi Bas prokýror. A.Daýylbaevtyń aıtýynsha, osy jyly prokýratýra bastamasy boıynsha 2012 jylǵa deıin zeınetkerlikke shyqqan ardagerlerdiń zeınetaqylaryn qaıta esepteýdiń burynnan kele jatqan problemasyn sheshýge múmkindik týdy.
