Kásibı kommýnıkatorlar ózderi bedeldi dep tanıtyn tulǵalardyń esimderin atady
ALMATY. Mamyrdyń 12-si. QazAqparat /Erlik Erjanuly/ - Kásibı kommýnıkatorlar Qazaqstandaǵy qazirgi jaǵdaıda ózderi bedeldi dep tanıtyn tulǵalardyń úshtigine Nursultan Nazarbaevty, Grıgorıı Marchenkony jáne Dosym Sátbaevty qosyp otyr. Bul búgin Almatyda ótip jatqan VI Halyqaralyq PR forýmda tanystyrylǵan «Kommýnıkatorlar barometrinde» málim boldy,
dep habarlaıdy QazAqparat.
«Bedeldi tulǵalardyń qatarynda sondaı-aq, Murat Áýezov, Gerold Belger, Qanat Berentaev, Oraz Jandosov, Oljas Súleımenov, Imanǵalı Tasmaǵambetov, Ermek Tursynov bar. Olardyń ishinde bılik organdarynyń ókili Astana qalasynyń ákimi I.Tasmaǵambetov qana. Bedeldi tulǵalar qoǵamda qandaı negizgi ról oryndaıdy degen saýalǵa kásibı kommýnıkatorlardyń 67 paıyzy túrli saýaldar boıynsha qoǵamdyq pikirdi qalyptastyrýda basty ról atqarady dep jaýap berdi. Al 27 paıyzy eń basty emes dese, 7 paıyzy basty rólde emes dep sanady», deıdi PR Communications konsaltıng agenttiginiń bas dırektory Ásel Qaraýlova. Onyń aıtýynsha, bedeldi tulǵalardyń elge jeke qatynasy arqyly qyzmet etýdegi rólin de mamandar árqıly baǵalaýda. Máselen olardyń 47 paıyzy basty dep sanasa, 44 paıyzy eń basty emes, 30 paıyzy basty emes dep ataǵan.
