Kásibı golfshylar Almatyda sheberlik sabaǵyn ótkizdi
ASTANA. QazAqparat - Búgin Nurtaý golf-klýbynda halyqaralyq deńgeıdegi kásibı golfshylar balalarǵa arnalǵan sheberlik sabaǵyn ótkizdi, dep habarlaıdy QazAqparat.
Eske sala ketsek, osy aptada Almatyda golftan European Challenge Tour aıasynda «Kazakhstan Open 2017» halyqaralyq týrnıri bastalǵan bolatyn. Osyǵan oraı, aıtýly jarys qatysýshylary Nurtaý golf-klýb akademııasynyń tárbıelenýshilerine tájirıbıelerin úıretti.
Balalar akademııasynyń dırektory Aleksandr Vongaı atap ótkendeı, «Kazakhstan Open 2017» chempıonatyna baq synasýǵa kelgen sheteldik mamandar barlyq qalaýshylarǵa óz kásibı mansaptary týraly áńgimelep, golftyń jańa ádisterin kórsetti.
Sheberlik sabaǵy Bredlı Neıl, Pıter Gýstafsson, Sem Hosbý jáne Manýel Treppl kásibı sportshylardyń qatysýymen ótti.
«Biz búgin tańerteńgi raýndty oınap bolǵan soń, osy sharaǵa qatysýdy uıǵardyq. Eń bastysy, balalardyń osy sportqa degen qyzyǵýshylyǵy bar. Olar barlyq keńesterge qulaq túrip, tapsyrmalardy buljytpaı oryndaýǵa tyrysty. Al biz árqashan tájirıbıemizben bólisýge daıynbyz», - dep atap ótti kásibı golfshy Sem Hosbý.
Óz kezeginde, jas sportshylar álemdik deńgeıdegi áıgili golfshylarmen bir alańda oınaý úlken mártebe ekenin atap ótti.
«Men búgin kóptegen jańa ádisterdi meńgerdim. Olar bizge qalaı oınaıtyndaryn kórsetti, paıdaly keńester berdi.Osyndaı múmkindik úshin uıymdastyrýshylarǵa alǵysymdy bildiremin. Árıne, mundaı sportshylar shabyttandyrady, men osy deńgeıge jetý úshin kóp jumys isteıtin bolamyn», - dep Kárim Naýryzov óz áserimen bólisti.
Esterińizge sala ketsek, «Nurtaý» golf-klýbynyń kásipqoı bapkerleri 6-13 jastar aralyǵyndaǵy balalar arasynda tegin sheberlik sabaqtaryn kún saıyn dúısenbiden jumaǵa deıin ótkizedi. Ár jetkinshek ózine yńǵaıly ýaqytty tańdap, aptasyna eki márte golfpen shuǵyldanýǵa múmkindikteri bar. Sonymen qatar, bapkerler bul jobany qala mektepterinde tanystyrýda. Qazirgi tańda, Naýryzbaı, Áýezov jáne Bostandyq aýdandary qamtyldy, al aldaǵy ýaqytta qalǵan aýdan mektepterine de osy joba usynylatyn bolady.
