Kásibı fototilshi Jeńis Ysqabaıdyń fotokórmesi ótti

«Jastar» sport saraıynda uıymdastyrylǵan sharaǵa 40  fotosýret qoıylǵan. QazAqpart tilshisine avtor óziniń týyndylary jaıly  arnaıy suhbat berdi.

-Sizdi kópshilik qaǵlez fototilshi dep ataıdy. Osy salaǵa siz qalaı keldińiz?

- Bul óner meniń boıyma tabıǵattan darydy desem artyq bolmas. Arnaıy tańdaǵan joqpyn. Bala kezimnen sýretti jaqsy salatynmyn. Tipti aýylda  meni «sýretshi» dep ataıtyn. Atam sheber bolǵan. Ol kisi qamshy óretin, er-toqym syndy  at ábzelderin ózi jasaıtyn. Ustazym  Gennadıı Paktyń da orny erekshe. Ol aǵash sheberi de boldy. Gıpspen de jumys jasady. Ustaz retinde keremet adam. Balanyń qabiletin asha biledi.  Men alǵash ret onyń aldyna 15 jasymda kelgende, «kózinde oty bar eken, jaqsy maman bolady» dedi. Múmkin meni  jáı ǵana demep aıta salǵan shyǵar. Biraq, osy bir sóz meni bolashaqqa jeteledi. Mamandyǵymdy súıýge, úmitti aqtaýǵa jol ashty.

- Al búgingi kórmeniń «Namys» dep atalýynyń syry nede?

- Bul kórme sport salasyna arnalyp otyr. Jas býyn sportshylarymyzdyń sýretterine qarap, bıik shyndardy baǵyndyrýǵa umtylsyn, namys pen jigeri oıansyn degen maqsatpen osylaı atadyq. Qabyrǵaǵa ilingen sýretter erekshe emotsııaǵa toly. Osyndaı sátter óskeleń urpaqtyń bıikke umtylýyna úlesin qosady degen senimdemin.  

- Qandaı dúnıelerdi túsirgendi jaqsy kóresiz, janyńyzǵa ne jaqyn?

- Sport. Bul janr erekshe emotsııaǵa toly. Qas-qaǵym sátterdi qaǵyp alyp, obektıvke túsirý, oıyńdy júzege asyrý ol basty mindet. Sondaı-aq aıtatynym, kez kelgen jerde ortamen jumys jasaı bilýiń kerek. Ol jerde sportshylar, tóreshi jáne kórermen bar. Osy jerde men basymdyqty negizi sportshylarǵa baǵyttaımyn. Óıtkeni erteń dál sol sportshylardyń sýreti úlken suranysta bolady.

- Kásibı sheberligińizdiń syry nede?

- Sheksiz súıispenshiligim shyǵar. Tipti aýyryp turyp, bir jarystyń ortasyna top ete qalsam, bárin umytamyn. Sýretke túsirý arqyly shabyttanamyn. Al oılaǵan oıyn, kadryń kópshilik kóńilinen shyqsa -  eńbegińniń nátıjesi.

- Alǵa qoıǵan qandaı arman-maqsattaryńyz bar?

- Sport salasyn túsiretin fototilshilerdiń basyn qosyp, bir komanda qurǵym keledi. Máselen men ózim fýtbol salasyn keremet túsiremin dep aıta almaımyn. Al sheteldik fototilshilerdiń bul turǵyda tájirıbeleri kóp. Óıtkeni olarda keremetteı, sońǵy úlgidegi quraldary bar. Al bizde ondaı dúnıeler joq. Óıtkeni óte qymbat. Tipti bir obektıvtiń ózi 10 myń AQSh dollaryna baǵalanatyn zattar bar. Sondyqtan osy turǵyda men sheteldikterdiń túsiretin apparattaryna qarap qyzyǵamyn.

Aıta ketý kerek, «Namys» atty kórmeni Almaty oblysynyń ishki saıasat basqarmasy men Almaty oblysynyń óńirlik kommýnıkatsııalar qyzmeti birlese uıymdastyrdy. Jeńis Ysqabaı 1980 jyly, 9 mamyrda Talǵar aýdany Týǵanbaı aýylynda dúnıege kelgen. Eki balanyń ákesi. Ol kolledjde  «Sáýletshi» jáne Abaı atyndaǵy ýnıversıtette «Sýretshi» mamandyqtary  boıynsha bilim alǵan.

Jeńis Ysqabaı fotoǵa túsirýdi ańshylyqqa uqsatady. Sebebi,  ańshy sııaqty oljaly bolý úshin ońtaıly sátti jiberip almaý kerektigin  aıtady.