Kásibı boks: Máskeýde taǵy eki qazaqstandyq jeńiske jetti

ASTANA. QazAqparat - Máskeýdegi kásibı boks keshinde taǵy eki qazaqstandyq sportshy rıngke shyqty, dep habarlaıdy QazAqparat tilshisi.

Aldymen Almaty oblysynda týyp-ósken Konstantın Brýsenskıı jartylaı jeńil salmaqta kásibı bokstaǵy alǵashqy kezdesýin reseılik Dagır Kachakaevpen ótkizdi.

Bul kezdesý alty raýndqa sozylýy tıis bolatyn. Konstantın oǵan jetkizbeı, ekinshi raýndta-aq qarsylasyn sulatyp saldy. Nokaýt!

Taǵy bir qazaqstandyq, 25 jasar almatylyq Alı Baloev (7-0, 6 KO) birinshi aýyr salmaqta segiz raýndtyq básekede Nıgerııa eliniń ókili Afınnı Abıodýnmen (6-1-1, 5 KO) sheberlik baıqasty.

Kezdesý barysynda A.Baloevtyń basymdylyǵy anyq baıqalyp, onyń aýyr soqqylary álsin-álsin daryp jatty. Aqyry segizinshi raýndta oń qolynyń soqqysymen nıgerııalyq boksshyny nokaýtqa jiberdi.

Eske sala keteıik,budan buryn Aıdos Erbosynuly men Nursultan Jańabaevtyń tıtýldyq jekpe-jekterin jeńispen aıaqtaǵanyn jazǵan bolatynbyz.