«Kásibı biliktilik týraly» zań jobasy qazaqstandyqtarǵa qandaı múmkindikter beredi
Sóziniń basynda vıtse-mınıstr qujat eńbek naryǵy men bilim berý júıesiniń baılanysyn nyǵaıtatynyn, sondaı-aq jumys kúshine qoıylatyn tez ózgeretin talaptarǵa jaýap berýge múmkindik beretinin atap ótti.
«Qazirgi kezde eńbek naryǵynda qarqyndy ózgeristerge tap bolyp otyr. Keıbir kásipter joıylyp bara jatyr jáne olardyń ornyna basqalary keledi. Bul rette kásipterdiń mazmuny da ózgerip otyr, ıaǵnı talap etiletin jańa biliktilikter paıda bolady», - dedi O. Ordabaev Ortalyq kommýnıkatsııalar qyzmetindegi brıfıngide.
Vıtse-mınıstrdiń aıtýynsha, zań jobasynda tolyq bekitilgen Ulttyq biliktilik júıesi (UBJ) kelesi suraqtarǵa jaýap beredi: qazirgi zamanǵy mamandar neni bilýi jáne úırenýi kerek? Bul úshin mamandarǵa neni oqytý kerek? Olardyń kásibı biliktiligin qalaı tanýǵa bolady?
Eńbek naryǵynyń negizgi talaptary kásiptik standarttarda kórsetilgen, olardyń negizinde bilim berý baǵdarlamalary ázirlenedi. Osy oraıda jumys berýshilerdiń talaptaryna sáıkes keletin kadrlardy daıarlaý qamtamasyz etiledi. Búgingi tańda eń kóp suranysqa ıe 2689 kásipti qamtıtyn 623 kásibı standart bar. Zań jobasynda barlyq kásipterdi qajetti standarttarmen qamtýdyń negizi qarastyrylǵan.
Zań jobasynyń mańyzdy jańalyǵy – óz betinshe ıgerilgen daǵdylardy, sondaı-aq beıresmı bilim berý nátıjelerin taný.
«Qazir adamdar daǵdylardy óz betinshe, jumys ornynda jáne onlaın rejıminde ıgerip jatyr. Biz oqytýdyń osyndaı zamanaýı ádisterin moıyndaımyz. Azamattar tıisti ortalyqtarda kásibı biliktiliginiń bar ekendigin rastaıtyn qujatty ala alady. Sonymen qatar, eger ol kásibı standartta eskerilse, bul qujatty jumysqa ornalasý kezinde bilim týraly dıplommen teń paıdalana alady», – dedi ol.
O. Ordabaev bul óz kezeginde biliktilikti taný ortalyqtaryn damytýǵa serpin beretinin jáne qyzmetkerlerdi ómir boıy quzyrettilikterin jetildirýge yntalandyratynyn aıtty.
Munymen qosa, zań jobasynda kásibı biliktilikti taný júrgiziletin kásipter tizbesin qalyptastyrý qarastyrylǵan.
