Qashyp júrgen shymkenttik alaıaq Astanada qolǵa tústi
ShYMKENT. QazAqparat - Shymkentte alaıaqtyq jasap, qashyp júrgen kúdikti Astana qalasynan ustaldy. Túrkistan qalasynyń 27 jastaǵy turǵyny ázirge 6 jaıtqa qatysy bar ekeni anyqtalyp otyr, dep habarlaıdy QazAqparat tilshisi.
Shymkent qalalyq ishki ister basqarmasynyń málimetinshe, Ál-Farabı polıtsııa bólimine Qazyǵurt aýdanynyń turǵyndary aryzdanǵan. Olardyń sózinshe, bir jigit jurtty Astana qalasyna qurylysqa jumysqa ornalastyryp beremin dep aqshalaryn alyp, qashyp ketken. Ony sodan beri taba almapty. Tártip saqshylary jedel-izdestirý is-sharalaryn júrgizý nátıjesinde Astana qalasynan kúdiktini ustady. Tergeý barysynda belgili bolǵandaı, Túrkistan qalasynyń týmasy jábirlenýshilerdi jumysqa kirgizemin dep, árqaısysynan 70 myń teńgeden alypty. Ol qarajattardy óziniń esepshotyna aýdarýyn suraǵan. Tergeý barysynda kúdiktiniń alaıaqtyq jolmen alty adamdy aldap, jarty mıllıon teńgege jýyq shyǵyn keltirgenin anyqtady.
Qazirgi tańda atalǵan jaıtqa qatysty Qylmystyq kodekstiń 190-shy «Alaıaqtyq» baby boıynsha is qozǵalyp, kúdikti qamaýǵa alyndy. Sotqa deıingi tergeý amaldary júrgizilýde.
