Qashyp ketken ekstremısterdiń Qazaqstan aýmaǵyna kirip ketýi múmkin emes - Qyrǵyzstan ІІM
BІShKEK. QazAqparat - Qyrǵyzstannyń ІІM keshe SIZO №50 bas bostandyǵynan aıyrý ornynan qashqan ekstremısterdiń Qazaqstan aýmaǵyna kirý múmkindigin joqqa shyǵaryp otyr, dep habarlady búgin vedomstvonyń baspasóz qyzmetinen.
«Qazirgi kezde eldiń barlyq aýmaǵynda kúsheıtilgen rejim engizildi. Qazaqstanmen yntymaqtastyq bar, aqparat almasý júrip jatyr. Halyqaralyq izdeý jarııalanǵan joq, ol úshin alǵysharttar bolmaýda. Olar eldiń aýmaǵynda jasyrynyp júrgeni ábden múmkin», - dep habarlady baspasóz qyzmetiniń ókili E.Osmonbaev.
Vedomstvonyń baspasóz hatshysy Baqyt Seıitov qazaqstandyq áriptestermen ózara yqpaldastyq aıasynda qylmyskerlerdi izdeýdi jáne ustaýdy qamtamasyz etýge múmkindik beretin qajetti sharalar ótkizilgenin atap ótti.
«Qazaqstandyq áriptestermen tyǵyz jumys júrgizilýde. Biz barlyq tuspaldaýlardy jiberdik. Áriptesterimizdiń asa qaýipti qylmyskerlerdi ustaýda tájirıbesi mol. Jambyl oblysynda polıtsııa kúsheıtilgen rejimge kóshti. Budan basqa, qyrǵyz-qazaq shekarasyndaǵy shekara beketteri de kúsheıtilgen rejimde jumys istep jatyr», - dep atap ótti B.Seıitov.
Buǵan deıin QR UQK tóraǵasynyń orynbasary - shekara qyzmetiniń dırektory Darhan Dilmanov qyrǵyz kúsh qurylymdarynyń qashyp ketken ekstremısterdi ózgeniń kómeginsiz ustaı alatyny týraly pikir bildirgen.
«Boljam boıynsha, bizden kómek suraýy ekitalaı. Qyrǵyz bıligi olardy óz aýmaǵynda ustaýǵa qabiletti jáne ony isteı alady dep oılaımyn. Qylmyskerlerdiń bizdiń aýmaǵymyzda júrgeni týraly qandaı da bir málimetter joq», - dedi túsiniktemesinde D.Dilmanov.
Buryn habarlanǵandaı, 12 qazanǵa qaraǵan túni №50 túzeý mekemesinen toǵyz sottalýshy qashyp ketken. Qashý kezinde olar túrmeniń úsh qyzmetkerin qylqyndyryp óltirip, bireýiniń basyn birneshe ret balǵamen soqqylaǵan.
Toǵyz qashqynnyń beseýi ustaldy, olardyń arasyndaǵy jaraqaty bar bireýi aýrýhanaǵa jetkizildi.
Tórteýi bostandyqta júr. Olardyń ekeýi ómir boıy bas bostandyǵynan aıyrý jazasyna kesilgen edi. Ekeýine qatysty tergeý amaldary júrgizilgen. Barlyǵy dinı ekstremızm men lańkestik úshin jaýapkershilikke tartylǵan.
