Qashyqtyqty qysqartqan iri temir jol jobasy iske qosyldy - FOTOREPORTAJ
Prezıdent aýqymy boıynsha bul eki joldyń qurylysyn keńestik kezeńdegi Baıkal-Amýr magıstraliniń qurylysymen salystyrýǵa bolatyndyǵyn atap ótti. KSRO-daǵy qurylystan ereksheligi, qazaqstandyq tarmaq yń-shyńsyz salyndy jáne jaqyn ornalasqan aımaqtardyń ǵana emes, barlyq Qazaqstannyń damýy úshin strategııalyq mańyzy zor.
«Búginde eki birdeı jańa temir jol magıstralin ashyp otyrmyz. Mundaı oqıǵa tarıhymyzda alǵash ret oryn alýda. «Jezqazǵan-Beıneý» jáne «Arqalyq-Shubarkól» jolynyń jumysy uzaq jyldar boıy birneshe óńirler men barlyq respýblıkanyń tynys-tirshiligin aıqyndaıtyn bolady», - dedi N. Nazarbaev.
Óz kezeginde, «Qazaqstan temir joly» ulttyq kompanııasynyń prezıdenti Asqar Mamın temirjolshylar Memleket basshysynyń temirjol qurylysyn salý tapsyrmasyn erekshe qulshynyspen qabyldaǵanyn atap ótti.
«Kólik qurylysshylary aýa raıynyń qolaısyzdyǵyna qaramastan, qysqa merzimde qyrýar jumysty qysqa merzimde atqaryp shyqty», - dedi A. Mamın.
Shynynda da orasan jumys atqaryldy, júzege asqan bul istiń mánin tilmen aıtyp jetkizý qıyn. Aýqymdy kólik jobasyn salý 2012 jylǵy maýsymda bastaldy. Qurylys aıasynda 1200 shaqyrym jol, 46 kópir men jol ótkeli salyndy, 570 sý ótkizý pýnktteri jóndeýden ótti, 4200 shaqyrymnan astam jerge elektrmen jabdyqtaý jelileri júrgizilip, basqa da óndiristik ınfraqurylym nysandary quryldy.
«Tasymaldaý úrdisiniń tehnıkalyq operatsııasy 23 stansada, 33 razezde júzege asyrylady. Onyń ishinde 6 jańartylǵan stansalar - Arqalyq, Shubarkól, Sekseýil, Shalqar, Beıneý bar. Infraqurylymdyq tehnologııalyq baılanystar ozyq sandyq standarttarǵa negizdelgen. Jańa jelilerdi paıdalaný úshin 3,5 myńnan astam jańa jumys orny qurylady, turǵyn úımen qamtamasyz etilip, áleýmettiń ınfraqurylym nysandary salynady.
Jańa temirjoldar «Soltústik-Ońtústik» jáne «Shyǵys-batys» baǵyttarynda júkter aǵyny marshrýttaryn myńdaǵan shaqyrymnan astam jolda jandandyrady. Jańa temirjoldy iske qosý Azııadan Reseı baǵytyna jáne Ázerbaıjan, Grýzııa, Túrkııa jáne Ońtústik Eýropa baǵytynda Kaspıı arqyly odan ári Eýropaǵa, Túrkimenstan arqyly Parsy shyǵanaǵyna shyǵatyn transqazaqstandyq kólik dáliziniń tranzıttik áleýetin kúrt arttyrady.
