Qashyqtan jumys isteıtin qazaqstandyqtardyń 70 paıyzy áıelder

NUR-SULTAN. QazAqparat - COVID-19 pandemııasynan týyndaǵan ótken jylǵy quldyraýdan keıin eńbek naryǵyndaǵy jaǵdaıdy qalpyna keltirýmen qatar, eńbek qyzmetiniń balamaly nysandaryn damytý arqyly jumyspen qamtýdyń sıpaty da ózgerýde. Bul týraly Eńbek jáne halyqty áleýmettik qorǵaý mınıstrliginen málim boldy, dep habarlaıdy QazAqparat.

«Búgingi tańda álemdegi árbir 5-shi adam qashyqtan jumys isteýge kóshti nemese úıinde jumys isteı bastady. «Eńbek resýrstaryn damytý ortalyǵy» AQ (ERDO) sarapshylarynyń derekterine sáıkes, Qazaqstanda 2021 jyldyń 1-toqsanynyń qorytyndysy boıynsha 73,7 myń adam qashyqtan jumys istedi, olardyń 70,2 paıyzy negizinen qalada turatyn áıel adamdar», - delingen mınıstrlik málimetinde.

2020 jyldyń basym bóliginde COVID-19 saldarynan jumystyń ıkemdi túrlerine kóshý protsesin jedeldetý búginde Qazaqstanda qashyqtan jumyspen qamtýdyń keń taralýynda kórinis tabýda. Qashyqtan jumys istegen nemese jumys isteı bastaǵan azamattardyń eńbek qyzmetin engizý - óz kezeginde qoǵamnyń jumyspen qamtýdyń balamaly nysandaryn qabyldaý protsesin jedeldetýge múmkindik berdi. Osynyń nátıjesinde Qazaqstanda erkin tabys dep atalatyn ekonomıkanyń damýy, eńbek qyzmetine áıelder men aýyl turǵyndaryn belsendi tartý boldy.

ERDO Strategııa jáne jobalyq basqarý departamentiniń dırektory Aleksandra Molchanovskaıanyń aıtýynsha, el boıynsha qashyqtan jumys isteıtin árbir 3-shi adam aýyl turǵyny bolyp otyr. Jumys berýshiler qashyqtan jumys isteıtin qyzmetkerlerdiń tek 14 paıyzyna ǵana kommýnıkatsııa quraldaryn bergen.