Qashyqtan jumys isteý kezinde qyzmetkerlerge jaǵdaı jasalady – zań jobasy
NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń Eńbek kodeksine qashyqtyqtan jumys isteýdi quqyqtyq retteýdi jetildirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.
Zań jobasyn Qazaqstan Respýblıkasy Parlamenti Májilisi men Senat depýtattary ázirledi.
«2020 jyly Qazaqstan aýmaǵynda COVID-19 koronavırýs ınfektsııasynyń taralýy qyzmetkerlerdiń orta eseppen jetpis paıyzyn qashyqtan jumys isteýge aýystyryp, jumys rejıminiń ózgerýine ákeldi», - dedi Májilis depýtaty Janat Omarbekova.
Onyń aıtýynsha, elde qashyqtan jumys isteýdi uıymdastyrýdyń qalyptasqan tájirıbesi pandemııa kezeńindegi eńbek salasyndaǵy naqty protsester men eńbek zańnamasy arasyndaǵy alshaqtyqty kórsetti.
Anyqtalǵan olqylyqtardy eskere otyryp, depýtattar birqatar usynys jasady.
«Bul usynystar taraptardyń kelisýi boıynsha qashyqtan jáne qashyqtan aralas jumys isteý uǵymdaryn engizý jóninde. Aralas jumys isteý jumys kezeńderin jumys berýshi ornalasqan jerde de, odan tys jerde de kezektestirýge múmkindik beredi. Qashyqtan jumys isteýge aýysqan qyzmetkerlerdiń tap bolǵan ótkir máseleleriniń biri – kommýnıkatsııa quraldarymen, kompıýterlermen jáne basqa da quraldarmen qamtamasyz etý boldy. Osyǵan baılanysty zań jobasynda norma kózdeldi, oǵan sáıkes tótenshe jaǵdaıdy engizý, tótenshe jaǵdaıdy jarııalaý jáne shekteý is-sharalaryn, onyń ishinde karantındi engizý kezeńinde ýaqytsha qashyqtan jumys isteý kezinde jumyskerlerdi kommýnıkatsııa quraldarymen qamtamasyz etý ári shyǵystardy óteý qajettiligi jumys berýshiniń aktisinde aıqyndalady», - dedi depýtat.
Onyń sózine qaraǵanda, eger jumysker óziniń kommýnıkatsııa quraldaryn turaqty negizde paıdalanatyn bolsa, jumys berýshi ótemaqy tóleı alady, onyń mólsheri, tóleý tártibi men merzimderi taraptardyń kelisýi boıynsha belgilenedi.
