Qashyqtan jumys istegen azamattarǵa eńbekaqy qalaı tólenedi
NUR-SULTAN. QazAqparat – Nur-Sultan qalasynyń qalalyq orta sapasy jáne baqylaý basqarmasy basshysynyń orynbasary Erlan Smaǵulov qashyqtyqtan jumys istegen azamattarǵa eńbekaqy qalaı tólenetinin aıtyp berdi, dep habarlaıdy QazAqparat tilshisi.
«Taraptardyń kelisýimen jáne óndiris barysy múmkindik berse, jumys berýshi qashyqtan jumys júrgizý tártibin bekite alady. QR Eńbek Kodeksiniń 138-babyna sáıkes, qashyqtan jumys isteý – eńbek protsesiniń erekshe formasyna jatady», - dedi Erlan Smaǵulov elorda ákimdiginde ótken onlaın-formattaǵy baspasóz máslıhatynda.
Ol sonymen qatar bul turǵyda jumys berýshi aqparattyq jáne kommýnıkatsııalyq tehnologııalardy qoldana alatynyn jetkizdi.
«Jumys berýshi jumysshyǵa kommýnıkatsııa quraldaryn usynyp, ol tehnologııalardyń qyzmeti men shyǵynyn kóteredi. Eger jumysshy árdaıym óziniń kommýnıkatsııalyq qurylǵylaryn paıdalanar bolsa, jumys berýshi onyń ótemaqysyn óteýi tıis. Onyń mólsherin taraptar ózara aqyldasyp, bekitip alady. Taraptardyń kelisýi boıynsha jumys berýshiniń jumysyn oryndaǵany úshin jumysshynyń tipti elektr energııasy, sý jáne ózge de qajettilikteri boıynsha shyǵyndar ótelýi tıis», - dedi ol.
Basqarma basshysynyń orynbasary qashyqtan jumys atqaratyndar úshin belgilengen jumys ýaqyty esebi bekitiletinin jetkizdi.
«Mundaı jaǵdaıda jumysty oryndaý sharttary, jumys ýaqytynyń esebi, shyǵyndar – taraptardyń kelisýi boıynsha, ıaǵnı jumys berýshiniń aktisimen nemese eńbek kelisimimen bekitiledi. Aılyq jumys júrgizilgen ýaqyt boıynsha tólenedi», - dedi Erlan Smaǵulov.
