Qashyqtan oqytýǵa qarjy bólingen joq – Bilim jáne ǵylym mınıstri

NUR-SULTAN. QazAqparat - Respýblıka bıýdjetinen qashyqtan oqytýdy uıymdastyrý úshin qarjy bólingen joq. Bul týraly QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Keshe qashyqtan oqytýǵa qarjy bólýge qatysty kóterilgen máselelerge oraı birneshe sóz aıtqym keledi. Búginde BAQ-ta kóptegen túrli aqparattar tarap jatyr. Bireýler qashyqtan oqytýǵa 70 mln dollar bólindi degendi aıtyp júr», - dedi ol Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, ótken oqý jylynyń 4-toqsanynda qashyqtan oqýǵa kóshirý májbúrli shara bolǵan.

«Bul aqparat shyndyqqa saı emes. Óıtkeni, qashyqtan oqytý osy jyldyń sáýir aıynda ǵana engizile bastady. 4-toqsanda qashyqtan oqytýdy júzege asyrý jaıynda aıtar bolsaq, oǵan qarajat bólingen joq. Sebebi, sol ýaqytta, 4-toqsanda bizdiń ınternet-platformalar barlyq resýrstaryn ashyp qoıdy. Tótenshe jaǵdaı rejımi kezeńi bolǵandyqtan bul tolyqtaı tegin jasaldy. Biz áriptesterimizge ótinish jasadyq, olar qoldaý kórsetti. Buǵan qosa, 4-toqsanda televızııalyq sabaqtar da tegin túsirilip, kórsetildi», - dedi Ashat Aımaǵambetov.