Qashyqtan oqytý: KVI juqtyrǵandardyń arasynda oqýshylar men muǵalimder joq

NUR-SULTAN. QazAqparat – QR DSM taýarlar men kórsetiletin qyzmetterdiń sapasy men qaýipsizdigin baqylaý komıtetiniń tóraǵasy Tımýr Sultanǵazıev Qazaqstandaǵy qashyqtan oqytý tártibiniń jetistigin týraly aıtyp berdi, dep habarlaıdy QazAqparat tilshisi.

«Memlekettik bas sanıtarlyq dárigerdiń qaýlysyna sáıkes, jumystaǵy adamdardyń 70 paıyzy qashyqtan jumys júrgizý tártibine kóshken bolatyn. Oqytýdyń ózi de 100 paıyz – túgeldeı qashyqtan júrgizýge aýystyrylǵanyn bilesizder. Áıtse de qashyqtan jumys júrgizý tártibine kóshpegen ujymdardyń ishinde koronavırýsty juqtyrǵandardyń artyp kele jatqanyn kórip otyrmyz. Osy rette bir jarqyn mysaldy keltire keteıin: bilim júıesinde, mektepter, ýnıversıtetter men kolledjder tolyǵymen qashyqtan oqytýǵa kóship ketkennen keıin biz oqýshylar, stýdentter men muǵalimder arasynda vırýs juqtyrǵandar múlde tirkelmeı jatqanyn kórip otyrmyz», - dedi Tımýr Sultanǵazıev Densaýlyq saqtaý mınıstrliginiń Facebook paraqshasyndaǵy suhbatynda.

Onyń aıtýynsha, qashyqtan jumys júrgizý tártibine kóshpegen ujymdardaǵy jumyskerler qarapaıym saqtyq sharalaryn ustanbaı, munyń saldary aıqyn kórinip otyr.

«Osyǵan baılanysty ótken aptadan bastap belsendi túrde jergilikti jerlerde reıd sharalaryn júrgize bastadyq. Aımaqtardaǵy shtabtardyń bárine de osyndaı tapsyrma berildi. Jedel shtabtar baqylaý komıtetiniń, polıtsııa ókilderimen birge shyǵyp, meıramhanalar men dámhanalardy tekseredi. Ótken aptada 10 myńǵa tarta nysan tekserilip, 1 myńǵa tarta ereje buzýshylyq anyqtaldy. Osy tekseristiń nátıjesi boıynsha jumysyn toqtatqan kásiporyndar da bar. Keıbir kásiporyndarǵa qatysty ákimshilik hattama toltyryldy. Bul jumys jalǵasyn tabady», - dedi ol.